5ê çeleyê 2020î de Wendekara Zanîngehê Munzurî yê Dêrsimî Gulîstane Doku (21) dîyaye vînîkerdene. Serrêke ra nata tehqîqatê serebûtî aver nêşi. Vergumano verên Zaynal Abarakovo ke derheqê ci de qet yew tehqîqat nêdîya destpêkerdene hema zî serbest o.

Tehqîqatê seba Gulîstane 

 Serdozgerîya Komare ya Dêrsimî tim îxtîmalê 'xokiştişî' ser o vindert. Coka Pirdê Dinarî yê Awbendê Uzunçayirî de 7ê çeleyê 2020î de xebatê cigêrayîşî dîyayî destpêkerdene. Awbend de cigêrayîşî ge vindertî ge reyna dest pêkerd. 23ê teşrîna peyêne de zî xebatê cigêrayîşî yê seba Gulîstane bi temamî ameyî qedînayene.

Bahaneya 'xokiştişî' pûç bîye

 Buroyê Krîmînalî yê Neteweyî rapor kerd ke çîyêk nêkewt Awbendê Uzunçayirî. Bi nê hawayî bahaneya 'xokiştişî' ameye pûçkerdene. Eşkera bi ke keso ke îdîaya 'xokiştişî' tewrê dosya kerde, babîyê Zaynal Abarakovî polîs Engîn Yuce yo. Dima reyna kifş bi ke keso ke 'mektuxê xokiştişî' yê Gulîstane 14ê çeleyî de çapemenîye reyde pare kerd Engîn Yuce yo. Yuce teşrîna peyêne de karî ra ame girewtene û derheqê ci de dewaya umûmîye ameye akerdene. Bi nê hawayî şikê kişîyayîşê Gulîstane zêdîyayî.

Kamî Zaynal pawenê? 

 Embazanê Gulîstane îfade kerd ke Gulîstane tewr peyêne hetê Zaynalî de bîye la hema zî derheqê Zaynalî de tehqîqatêk nêame akerdene. Embazanê Gulîstane ard ziwan ke tay kesî Zaynal Abarakov pawenê. 

Keyeyê Gulîstane Doku yo ke seba edaletî têgêreno serrêk a ke maruzê gef, destbendkerdiş, tehqîqat û hêrişan bi.  

Cinîyî do seba Gulîstane meydanan de bê

Cinîyî ewro sere de Dêrsim de her cayê Vakurê Kurdîstanî û Tirkîya de seba Gulîstane vejîyê meydanan û reyna aqîbetê ci bipersê. Cinîyî wazenê ke Gulîstane bêra dîyene û mesuldaranê nê serebûtî ra wa hesab bêro persayene.