Gerîla Aryene Argeş aslê xo de herêma Hewraman ra ya. Hewraman kewenı mabênê şaristananê Merîwanî û Sinê û bi dînê Yarsanî yeno naskerdene. Gerîlaya hewramane Aryene Argeş derheqê dîn, kultur, nêzdîbîyayîşê komelkî yê dînê Yarsanî de qisey kerd û vat: ''Yar yeno manaya embazî û San zî yeno manaya rayber. Seke yeno zanayene Yarsanî û elewîyî û Êzdîdî Mîtra xo sey ci vînenê ke bawerîya înan Mîtraîzmî ya. Yarsanî de mar û maro sîya zaf fîraz ê. Vanê ke mar xo dormeyê porê dadîya Mîtra ra besteno ke nêro cêrakerdene.Yarsanî de adir fîraz o.

Kulturê Yarsanî yê zewajî de yarsanîyî kênayê xo nêdanê teber, la teberî ra kêna gênê. Kulturê ma de cinî û camêrdî serê astoran de pîya dans û şer kenê. Bawerîya yarsanî de cenet û cehenem çin ê. La wexto ke yew dadîya xo ra bibo yarsanî bermenî û vanê ame dinyaya xirab. Wexto ke yew bimiro zî şayîye kenê ke vanê dinyaya xirabe ra şîyo. Komelê ma de rolê dadîyan girîng ê. Dadîyî cuye îdare kenê, no kulturê Mîtraîzmî ra yeno. Dadîya Mîtra seba ma sembola tewr berze ya dînê yarsanî ya. Kulturê ma de camêrdî nêbenê pîr. Coka vatişê sondo tewr pîl ê yarsanîyan bi mûneyê dadîyan yeno wendene. Bêguman no sond zî bi asanî nêno wendene.

Rejîmê Îranî yarsanîyan sey kafîran vîneno û qedexe keno. Rejîmê Îranî de nika tecawuz, porqesnayîş û kiştişê yarsanan meşrû yê lê ê hîna rehet nêeşkenê dekewê herêmanê yarsanan.

Mi domanîya xo de Têgêrayîşê Azadîye yê Kurdîstanî şinasna. Birayê mi serra 2014î de tewrê HPGyî bi. Ey mi rê zaf tesîr kerd. Birayê mi mi rê kitabê Rayber Apoyî erşawit ke tesîrê mi kerd. Birayê mi şexsê ey zaf sakîn bi û tewirê ci yê vera cinîyan raşt a zî zaf bale antêne. Birayê mi netîceya dafike de ke apê mi vera ey kerdbi şehîd bi. Ez zaf bîya hêrs û mi waşt ke ez qesasê birayê xo û keyeyê xo bigêra. Naye ra ez tewra gerîlayan bîya.

Hîkayeyê birayê mi komelê ma de yeno sereyê her kesî. Beno ke merdim nê koyan ra terseno û hesaban keno. Na rewşêka normal a. Mîyanê PKKyî de her hetî ra dîn û bawerîyî estê. Wexto ke ez ameya tîya mi hetê ziwanî ra tay zehmetîye ante. La dima ez ziwan musaya. Nika ma yewbînan fam kenê. Komelê ma de cinîyî rayberî kenê tîya de zî cinîyî rayberî kenê. Coka felsefe û raîtîya partîye mi rê ecên nêameyî. Yanî bi esasî PKK partîyêka Rayberî, şehîdan û cinîyan a.''