Endama Heyetê Îdareyî yê Kongreya Starî Evîne Swêd bi wesîleya 8ê Adare Roja Cinîyan ê Kedkaran a Dinya ANFyî reyde qisey kerd û tay ercnayîşî kerdî.

Qiseykerdişê Swêde ra beşêk wina yo:''Şorişê Rojawanî  rayberîya cinîyan de bi bedelanê giranan ame kerdene û bi şorişê cinîyan. Cinîyan şoriş de bi hawayêkê çalakî ca girewt û têkoşîn kerd.Şorişê Rojawanî bi kede, xîret û xoverdayîşê cinîyan ame kerdene. Serra 2013î de cinîyanê sûryanan Rojawan de reya verêne rêxistinbîyayîşê xo kerd. Cinîyanê ereban zî vera hêrişanê DAÎŞî xo rêxistin kerd û mîyanê şorişî de ca girewt.  Ma sey Kongreya Starî perwerdeyê xo bi giranî tecrubeyanê cuye ser o partîk kenê.

Ma perwerdeyê xo hempar kenê, camêrdî û cinîyî pîya perwerde vînenê. Hêrişê dewleta tirke yê vera cinîyan pêro dinya de bi hawayêkê eşkerayî ameyî dîyene. Hêverî cerganê DAÎŞî hêrişê cinîyan kerdêne la dima dewleta tirke dest pê hêrişanê xo kerd.Efrîn, Serêkanîyê û Girê Sipî de cinîyî benê hedefê tacîz, tecawuzan û îşkenceyan. Dewleta tirke wazena ke têkoşînê cinîyan, şorişê cinîyan çin bikera. La do nêeşka naye bikera.

YPJ senî ke heta nika komel de bi rolê rayberîye têgêra û DAÎŞ qedîna nika zî vera hêrişanê dewleta tirke xoverdayîşêkê pîlî kena.Hêrişê ke 9ê teşrîna verêne de dest pêkerd têna vera Girê Sipî û Serêkanîyê nêbîyî. Hedefê înan de Şengal zî estbi. Xoverdayîşê cinîyan hem şexsê YPJyî de hem zî şexsê Kongreya Starî de verê nê hêrişan girewt.Dezgehê cinîyan ê dinya hêrişanê vera Rojawanî vînenê û yewîya nê dezgehan mojnena ke destkewteyê cinîyan ê pêroyînan yew ê. Coka vera hêrişan ma do xoverdayîşê xo yê vera pederşahîye pîl bikerê û nê têkoşînî heta serkewtişî bi qerardarîye dewam bikerê.''