Zîndanê Evîne yê Îranî de cinîyan ê tepişteyan îdamî protesto kerdî. Wextê protestoyî de hêrişê cinîyan ame kerdene. Dîya zanayene ke hêriş de Endama KJARî Werîşe Muradî birîndar bîya.
Zîndanê Evîne yê dewleta Îranî de cinîyan ê tepişteyan îdamê Reza Resaîyî protesto kerd. Resaî seba ke tewrê çalakîyanê Jin, Jiyan, Azadî bîyo 6ê tebaxe de amebi dardekerdene.
Îdamê Resaîyî ra dima xeylêk zîndanan de tepişteyanê sîyasîyan çalakîyê protestoyî kerdî.
Goreyê xeberêka JINHA Zîndanê Evîne de zî cinîyan ê tepişteyan çalakîya protestoyî kerde. Ame parekerdene ke îdareyê zîndanî hêrişê çalakîya cinîyan kerd û hêriş de Endama KJARî Werîşe Muradî birîndar bîya.
Goreyê çimeyan polîsanê Îranî hêrişê Werîşe kerd û ci rê îşkence kerd. Îşkenceyî ra dima bedenê Werîşe masa û birînî virazîyayî. Dîya zanayene ke destûr nêdîyayo ke Werîşe nêweşxane de tedawî biba.
Tepişteyan pê hesna ke fermanê îşkenceyî hetê Hadî Mohammadîyî ra ameyo dayene.
