Aktivîstanê TJA tecawuzê domana 5 serrî ya Kanarya ya Senbolî şermezar kerd. Parlementera HDP'yî Semra Guzele, ard ziwan ke tecawuzê vera domanêka 5 serrî, binkewtişê cimatî  ramojneno û vat, “Berpirsîyarê serebutî hukmatê  AKP’yî yo.”

Têgêrayîşê Cinîyan ê Azadan (TJA), derheqê tecawuzê vera domanêka 5 serrî ya Taxa Kanarya ya qezaya Kuçukçekmece ya Senbolî, verê banê HDP'yî yê Amedî de eşkerayîye daye çapemenîye. Parlementera HDP'yî ya Amedî Semra Guzele bi nameyê TJA  eşkerayîye daye û vat, “Verê tepiştişê faîlî qerarê nimitişî yê serê dosyaya cipersayîşî, dana teber ke bi nê cehd kenê ke serê îstîsmarî bigêrê.”

Ziwano cîyakar tecawuzî xurt keno

Guzele dewamê qiseykerdişê xo de vat, “Tacîz, tecawuz, şîdetê vera cinîyan her roje bi hawayêko bin dewam keno. Tewr peynî de Qezaya Kuçukçekmece ya Taxa Kanarya ya bajarê Stenbolî de 23’ê Nîsane de domanêka 5 serrî ameye îstîsmarkerdene. No hêriş binkewtişê wijdanê cimatî yo. Ganî vera bîyayîşanê tacîz, tecawuz, şîdetî heme wareyanê cimatî de, reaksîyonê hemparî bêrê dayene.”

Berpirsîyar hukmatê AKP’yî yo

Guzele bale antê serê potîkayanê AKP’yî û vat, “Kêmkerdişê cezayanê  sûcanê  tacîz û tecawuzan seba sîstemê serdesteyan çimayê peyan ser o vinetişî yo. Na vera cinîyan dişmenî ya. Yeno pawitene ke vera nê çîyan têkoşîn bêro kerdene la vera nê çîyan hukmat bi ziwanê camêrdîye tê gêreno û  wazeno bi naye îradeyê cinîyan çin bikero. Berpirsîyarê nê serebutî hukmatê AKP’yî yo.”

Guzele peynîya qiseykerdişê xo de ard ziwan ke ê do domanan bipawê û vengdayîş bi selahîyetdaran kerd û vat “Ma do cinîyan reyde têkoşînê xo dewam bikerê. Ganî heme faîlê berpirsîyarê tecawuzê domananê qijan bêrê dîyayene. Seba ke tecawuz bêro cezakerdene ma vengdayîş bi selahîyetdaran kenê ke wezîfeyê xo bîyarê ca.”