Startê çalakîyanê 8ê Adare Roja Cinîyan ê Kedkeran a Dinya yê ke hetê Têgêrayîşê Cinîyan ê Azadan TJA ra ameyî organîzekerdene Pirdê Dînarî yê Dêrsimî de ame dayene. Gulîstane Doku ya ke 54 rojî yo vînîbîyaye ya tewr peynî de serê nê pirdî de ameyebî vînayene û tîya de cigerayîşê ci dewam kene. Coka TJA tîya de çalakîyê xo dayî destpêkerdene.

Keyeyê Gulîstane Doku, partlamenterê HDPyî Gulîstane Kiliç Koçyigît, Dersime Dag, Zuleyha Gulum, Dilşate Canbaz Kaya, temsîlkarê HDPyî, Komeleya Cinîyan a Roza, wendakarê Unîversîteya Munzurî û rêxistinan û dezgehanê cinîyan ê herême ra xeylêk cinîyî tewrê eşkerayîye bîyî.

Waya Gulîstane Doku Aygule Doku ya ke eşkerayîye de qisey kerd veng kerd babîyê Zaninal Abarkovî Engin Yucerî yo ke polîs o û vat:'' Ez do heqa waya xo her kesî bigêrî. Şima yew dayîke rê da vatene ke ' kênaya mi merdebî zî wa bêro vînayene ke tewr tay ez virar şirê herra ci ra' wa her kes bizano ke heta vînayîşê Gulîstane ez Dêrsimî canêverdena.''

Bi nameyê platformî Duygu Kurban zî vat: ''Ma zana ke heq yeno girewtene û no têna bi têkoşînî mumkun o. Coka ganî ma hêzê bikerê yew û vejê meydan.''

Parlamentera HDPyî ya Muşî Gulîstane Kiliç Koçyigit zî  bale ate ke dewleta ke ganî destûr nêdo şîdet û tecawuzî hîna verê înan akena û vat: ''Zînîyetê AKPyî eşkerayo, wanê wa cinî camêrdî rê îtaat bikero. Ma  cinîyî kuçeyan  û her warê cuya de vera naye têkoşîn kenê. Ma hêzê o têkoşînê xo ra gênî û heta vînayîşê Gulîstane ma do mevinderê.''