Hemsereka DBP’yî Sebahat Tûncele û parlamentera verêne ya HDP’yî Selma Irmake Hepisxaneyê Kandirayê Tîpê F’yî de 96 rojî yo vera tecrîdî grevê vêşanîye de yê. Tûncele û Irmake derheqê xoverdayîşî de peyam şawit. Tûncele û Irmake 15’ê Çele de beşdarê grevê vêşanîye yê vera tecrîdkerdişê Rayberê Şarê Kurdî Abdullah Ocalan bibî.

Tûncele: Ma do ser bikewê

Peyamê Tûncele û Irmake wina yo:

Sebahat Tûncel; “Hêvîdar a ke no prosesê xoverdayîşî yo ke xeylî hemrayê cinîyî zî beşdarê ci bîyê û serkêşîya Leyla Guvene de yeno kerdene, do ser bikewo. Ewro polîtîkaya îzolasyonî, tecrîd û ‘huqûqo taybet’ o ke şexsê rêzdar Ocalanî de yeno kerdene, serê heme şarê Tirkîya de yeno kerdene. Wedaritişê tecrîdî teyna seba şarê Kurdî ney, seba şarê Tirkîya zî do bibo destêkê prosêkê neweyî.”

Irmak: Tecrîd tesîrê heme cimatî keno

Selma Irmak; “Heme dinya, dost û dişmenî baş zanê ke rêzdar Abdullah Ocalan kesêk nîyo; şarêk o, heqê netewa demokratîke yo, her keso ke azadîye ra, heqanê merdiman ra; bi haştîye bawer keno û  cigêrayîşê heqîqetî keno yo. Sîstemê tecrîdê mutlaqî yê Îmraliyî yo ke 20 serrî yo yeno kerdene sîstemê teslîmgirewtişî, çokdayîşî, cendereyê serê roja ewroyî ya heme cimatî û ameyoxî ya. La netîce nêameyo girewtene û netîce zî do nêro girewtene. “