Federasyona Komeleyanê Êlihî (BADEF) zî derbazê sîstemê hemserekîye bî. Hemsereke Canan Turelîye vat ke ê do bi pergalê hemserekîye hîşmendîya desthilatî ya ke cinîyan keye de girewte verdana bivurnê.
Yewîya Ciwananê Bekiranî ra dima Federasyona Komeleyanê Êlihî (BADEF) zî derbazê pergalê hemserekîye bî. Canan Turelî ya ke hemsereka BADEF’î ya verêna 28 serrî ya. Turelî vana destpêk de tay qirqilîyaya û xo bi xo persaya ke do a se bikera. Turelî vana verê hemserekîye komele tena cayê camêrdan bîyo û tede okey û qeremaç ameyo kaykerdene la a ke kewena mîyanê xebate no hewayê komele vurîyeno.
‘Ma Wazenê ke Pêro Waran de Xo Biresnê Cinîyan‘
Turelî çar cinîyan reyde xebitîyena û vana ke heta nika zafêrîyê xebatan cinîyan û domanan ser o kerdê. Turelî xebatan ser o vat “Bi tewrê cinîyanê derdoranê cîyayan, her warî de xebatanê jineolojî kenê, pîya probleman ser o munaqeşe kenê û çareyan ra gêrenê.” Turelî wina dîyar kerd ke 2018‘î de burs dayo 26 wendekaran û emser zî hedefê înan o yo ke burs biderê zêdeyêr wendekaran. Ê keyeyan zîyaret kenê, şonê serweşîyan û her warî de wazenê ke xo biresnerê cinîyan.
‘Ma do Pêro Waranê Cuye de Estbê‘
Turelî dewam kerd û vat komele de ê tena di cinî yê la cinî pêro waranê cuye de estê û do estberê zî. Nê hedefê înan ra serkewte ê do verî rewşe bivurnerê. Turelî nîya dewam kerd “Bi pergalê hemserekîye ma do bivurenê. Vera hişmendîya serdeste ke hemê waranê komelî de esta û wazena ke cinîyan keyeyan de bitepîşa ma do xover bidê û ma do na raştîye bivurnê. Sey Yewîya Ciwananê Bekiran (BADEF) ma do atolyeka jineolojîye akerê û bursan bidê ciwanan. Ma do perwerdeyîya wendiş û nuştişî bidê cinîyan. Xebatanê kulturî zêde bikerê. Dersanê dengbejîye ser o zî ma do vinderê.”
‘Komelo ke Cinî Tede Azad Nîyê Azad Nîyo‘
Turelî vat ke ê destek danê kampanyaya TJA ya ke nika dewam kena, vera helwesto ke wazena ke sîstemê hemserekîye krîmînalîze bikero zî wina vat “hemserekîye îradeya ma ya. Keda ma cinîyan hemû waranê cuye de esta la namayê ma çin o. Ma wazenê ke sey waye û kênaya fîlan kesî ney bi nameyê xo hemû waran de bê. Her roj ma yenê kîştene û wazenê ke ma bêveng bimanê û ma do mekewerê mîyanê ê qaliban ke wazenê ma cikerê. Ma ra vanê ke bi mîrê destê xo nêzdîyê karan mebê û bi naye wazenê ke ma cayê xo ra melewîme. Komelo ke cinî tey azad nîyê azad nîyo. Ganî ma azad bê ke komel zî azad bo. Eke ma hişê xo azad mekerê û merdimê duştê xo sey cînsîyetê ci ney tena sey merdimî mevînê ma do gameka bîne apey şîrê. Ma wazenê ke nê qaliban bişkînê û heta ke bîbê azad xo ver bidê. ’’
