Nê rojan de ke 8ê Adare Roja Cinîyan ê Kedkaran a Dinya yena fîrazkerdene vera şîdetê serê cinîyan û kişîyayîşê cinîyan Wan de komeleyêka newîye awan bîye.

Komeleya Cinîyan a Starî rayberîya hewt cinîyan de awan bîye û wazena ke cinîyanê ke maruzê şîdetî benê bi xurtî bipawa û derheqê na mesele de zanayîş bida komelî.

'Şîdet meseleyêka mîyanneteweyî yo û ganî verê ci bêro girewtene'

Vervatoxê Komele Serape Guvenç xebatanê komele ser o zanayîşî dayî û vat ke şîdetê vera cinîyan dinya de vila bi û na têna meseleyêka Tirkîya ney meseleyêka mîyanneteweyî yo.

Guveçe vat: ''Şîdet meseleyêka pîl o.  Na mesele têna cinîyan ney pêro komel eleqedar kena. Ganî ma şîdet têna sey fîzîkî nêvînê. Şîdet meseleyêka ke bi psîkolojîk, komelkî, cînsî, şîdetê fekkî, şerî û ekonomî zêde beno. Seba pawitişê cinîyan ganî xizmetêko xurt bêro kerdene. Ma bi awankerdişê komele armanc kenê ke seba ke komel na mesele fam bikero çareserîya pêşnîyazî peyda bikerê. Ganî komel paştî bidê cinîyanê ke rastê şîdetî ameyî. Çîyêk nêeşkeno ke şîdetê camêrdan ê vera cinîyan sey heqdar bimojno. Komeleya ma do biba vengê hezaran cinîyan.''