Endama Îdareyê Kongreya Starî ya Herêma Efrînî Wehîde Xalid ANFyî reyde derheqê têkoşînê şarê Efrînî yê şertanê koçberîye, rayberîyan cinîyan de qisey kerd.

Qiseykerdişê Wehîde Xalid ra beşêk wina yo:

''2 serrî vîyartî ke dewleta tirke û cergê ci Efrîn îşxal kerd. Şarê Efrînî rayberîya cinîyan de vera îşxalî xoverdayîşêko bêhempa mojna. Nê îşxalî ra dima şarê Efrînî neçare mend ke koçê Şehba bikero. Şert û mercê koçberîye bi taybetî seba cinîyan zaf zor ê. Cinîyanê Efrînî Şehba de zî şar rêxistin kerd, xebatê xo dewam kerdî. Cinî û camêrdî pîya têgêrayî û înan kerd ke komunî newe ra bêrê awankerdene. Cinîyan viraştişê keyeyan de zî ca girewt. Bi nê hawayî polîtîkaya taybete ya dişmenan a vera cinîyan ameye pûçkerdene. Şehba de cinîyan kombîyayîşî kerdî, koordînasyonî amade kerdî ke hewcedarîyê şarî cade bêrê peydakerdene. Pêro qezayan de merkezê Kongreya Starî û keyeyê cinîyî ameyî ronayene. Komîteya perwerdeyî, weşîye û ekonomîyî ameyî awankerdene.

Reyna komîteya edaletî ameye ronayene ke cinîyî zî tede ca gênê. Bi taybetî nê di serranê peyênan de vera cinîyî zaf hêrişî ameyî kerdene. Nê pêro bi perwerdeyan ameyî pûçkerdene. Derheqê cinîyan de konferansî ameyî kerdene ke nê konferansan de derheqê cagirewtişê cinîyan ê komelan de munaqeşeyî ameyî kerdene. Hêzê îşxalkerî tewr zaf komelêk ra tersenê ke nê komelî bi hîşmendîya cinîyan xo rêxistin û perwerde kerd.  Dewleta tirke wazena ke xeyalê xo yê dewleta osmanijan newe ra ganî bikera. Çend ke ê hêrişê xo giranêr kenê, şar zî xoverdayîşê xo keno xurtêr. Îşxalkerî her roje dewan ser o bombayan varnenê. LA her roje xoverdayîş beno pîlêr. Şar kuçeyan de yo, rayberîya naye zî cinîyî kenê. Tewr peyêne îşxalkeran waşt ke şexsê Hevrîne Xelef de îradeyê cinîyan bişiknê. Cinîyî yenê qetilkerdene, remnayene, tecawuzkerdene.

Waranê ke ameyî îşxalkerdene ke hêrişê dewleta tirke dewam kenê. Goreyê doneyanê ma 2 serranê peyênan de Efrîn de 1000 cinîyî ameyî remnayene, 100 cinîyî ameyî qetilkerdene, 60 cinîyî maruzê tecawuzî bîyî, 5 cinîyan zî xo kişt. 35 cinîyî zî sey îşkence maruzê kerdişan ê bînan mendî. Nê têna doneyê Efrînî yê. Rojawan de Serêkanîyê de zî nê kerdişê bêexlaqî dewam kenî. Cinîyî do bi felsefeya Rayber Apoyî xoverdayîşê xo dewam bikerê û nê ra tawîz nêdê. Cinîyanê ereban, kurdan, sûryanan pêro bire daye. Cinîyî do wayîrê neteweyê demokartîkî bivejîyê, derheqê Sûrîye de pîya bire bidê û bibê veng û îradeyê cinîyan.''