Fermandarîya Qerargehê Merkezî ya YJA Starî bi wesîleya 8ê Adare Roja Cinîyan ê Kedkeran a Dinya eşkerayîyêka nuştîye daye û nê pare kerdî:

''No demo ke ma her wextî ra zafêr azadîye ra nidzî yê, ma kewenê 8ê Adarêka neweyî. Ma sere de mîmarê cuya newî Rayber Apo cinîyanê ke her cayê dinya de vera sîstemê serdestî têkoşîn kenê silam kenê û 8ê Adare înan fîraz kenê. Reyna şehîdê ma yê ke bi têkoşînê xo tarîx û hefizaya cinîyan afernayene ma înan zî bi hurmet yad kenê.

Ewro cinîyê kurdan her ca de her warî de sey rayberî vernîya sefanê têkoşînî de ca gênê. Senî ke ayebîyayîşê kurdan bi PKKyî dest pêkerd şerê estbîyayîşê cinîya kurde meydanvetiş zî bi PKK û paradîgmaya Rayber Apoyî bi.  Cinîya kurde ke bi PKKyî kewtî mîyanê sîyasetî ewro dinya de rayîrê sîyasetî bewlî kena, vera sîtemê yew hêz a. Cinîyê kurdan têna Vakur de nê Başûr, Rojhelat û bityabetî zî Rojawan de xo rêxistin kenê hêzê xo yê pawitişî vejenê meydan û îredeyê camêrdî ra benê cîya û xoser tê gêrenê. Rojawan de cinîyan sefanê vernî yê şerî de ca girewt. Heme dinya  xoverdayîşê cinîyan kurdan ê  vera çeteyanê DAÎŞî rê bîyî şahîd. Cinîyan ê kurdan reyna îspat kerd ke ê senî pabesteyê cuya azad ê. Çîçeke, Şevîne, Evîne û Dileyan bi xoverdayîşê xo yê biheybetî ramojna ke ê senî rêça Zilanan û Bêrîtanan de yê. Tradîsyonê xoverdayîşo ke Rosayan ra heta Sarayan dewam kerd do ser bikewo.

Ganî cinîyê kurda hînî têna koyan nê, deştan, kuçeyan, bajaran, dewan her cayî bi açarnê warê têkoşînî. Eke çew keye de xo binimno çew azadîye dest nêfîneno.  Hêrişê vera cinîyan her ca de esto. Keye, mekteb, kuçe, cayê kerê  û meclîs de her ca de hêriş û şîdetê vera cinîyan esto. Cinî ganî waranê xo yê azadîye bîyarê ra û înan bipawê.  Netew û komelo demokratîk bi  xoverdayîşê cinîyan benê.  Wa cinî naye qet xo vîr ra nêkerê eke helêk peyê xo bikerê têkoşînê azadîye ê bi xo kenê vîn. Sibayê azadî şorişo ke cinî afernena de nimite yê. Ma sey YJA Starî reyna sozê şorişê cinîyan danê û vanê komelo azad bi xoverdayîşê cinîyan do bêro afernayene.''