TJK-E Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' bi kampanyaya 'Tîrêjên Rojê' kirişte safhayêka newîye. Kampanya 4ê êlule de Cenevre de do dest pêbikera. 

Siba verê Ofîsê Neteweyanê Yewbîyayeyan (NY) de, saete 13.00 de eşkerayîya çapemenîye do bêra dayene. Şîarê kampanya zî 'Rayber Apo teyna seba Kurdîstanî ney seba pêro dinya haştîye do bîyaro' yo.

Yewîya Cinîyan ê Kurdan a Swîsre (YJK-S) zî pare kerd ke ê tewrê kampanyaya 'Tîrêjên Rojê' bîyê û venga pêro kesan zî da ke wa tewrê kampanya bibê. 

YJK-Syî da zanayene ke ê do 4ê êlule ra heta 12ê teşrîna verêne kampanya rê dewam bikerê û şaristananê Aarau, Basel, Zurich, Luzern, St Gallen, Lozan, Bernî de çalakîyan bikerê.

YJK-Syî vat: ''Ma 4ê êlule de verê bînaya NYyî de dest pê çalakîyanê xo kenê. Ma venga pêro welatperwer, demokrat û cinîyan danê ke tewrê çalakîye û na kampanya bibê.''