Fermandarîya Pêroyî ya Yewîyanê Pawitişî yê Cinîyan (YPJ) bi eşkerayîyêke nasnameyê hîrê şehîdan eşkera kerd û nê pare kerdî:

"Dewleta tirke ya kiştoxe her roje bi metodanê xo yê ke sînorê şerî ra ravîyartî hêrişê şarê ma yê Rojawanî û serkêşanê şorişî kena.  Têkoşînê ma zerrîya Erdoganê gonîwerî de terso pîl afirnayo. Dewleta tirke hetê daîreyê şerê taybetî ra yena îdarekerdene. Çirey vera însanan wina qirkerdişo organîzekerde nêameyo kerdene. Ewro merkezê nê qirkerdişî Sûrîye ya. Dewleta tirke wazena herra ma îşxal bikero. Coka bi metodanê cîya cîyayan heme vengê ke semedê haştîye û azadîye benê berz hêrişê ci kena ke bifatisno.

Ma sey Yewîyanê Pawitişî yê Cinîyan destpêkerdişê têkoşînî ra nata bi îradeyê xurtî têkoşîn kenê. Ma bi seyan şehîdî dayî.  Na raştîye çimê heme şaran ke gêrênê azadîye û akerdî. YPJ bi şerê xo yê vera DAÎŞî  estbîyayîşê xo semedê merdimîye feda kerd. YPJ heme dinya de sey hêvî, modelê cuyeya newî yeno naskerdene.  La nê cinîyê qehremanî hedefê hêrişanê Erdoganî de yê.

15ê êlule de serrgêra hêrişanê vera Kobanê de hedefgirewtişê cinîyan ê şorişgêran tesaduf nîyo. Na dişmenîya dewleta tirke tersayîşê ci mojnena. Rayber Apoyî na herre de erjê xurtî afirnayî. Tîya komelêko newe ameyo afirnayene. Nê keyeyan ra yew zî keyeyê Fermandare Şervîn o.

Fermandare Şervîne 1981 de bajarê Dirbêsiyê de ameyedinya û 1988î de tewrê têgêrayîşê azadîye bîye. Fermandare Şervîne xeylêk wext koyanê azadan de têkoşînî rayra berd û dima ra tewrê şorişê Rojawanî bîye. Fermandare Şervîne têkoşînê xo yê 25 serran de bi ruhê fedakarî berpirsîyarîyê xo ardî ca û seba ke her warê cuye de şorişî înşa bikero, bipawo û bidomno xebetê bêhempa kerdî. Waranê sîyasî, dîlomatîk û pawitişî de xeta mîlîtanî ya Rayber Apoyî temsîl kerdêne. Fermandare Şervîne Operasyonê Zixmkrdişê Asayîşî yê Dêrazorî de  sey fermandara serkêşe ca girewt. Hemraya jîhate û Fermandare Şervîne sey cinîyêka şorişgêre refanê azadîye de bîye fermandara şorişê azadîye.

Hemraya ma Nûcane zî semedê pawitişê destkewteyanê şorişî û vergirewtişê hêrişanê îşxalî serranê xo yê ciwnan de tewrê refanê YPJyî bîye. Hemra Nûcana ke Minbicî ra ya refanê azadîye de ruhê cinîyan ê ciwanan temsîl kerdêne. Semedê ronayîşê sîstemêkê demokratîkî wezîfeyê muhîmî girewtî xo ser.

Hemra Canda Cûdî zî bajarê Girê Sipî ra ya. Bado ke dewleta tirke Girê Sipî îşxal kerd, seba ke îşxalkeran ra qesas bîgêro tewrê refanê YPJyî bîye. Hemra Canda wayîrê erjanê komelî vejîyaye û sey dayîka di domanan peyser game nêeşte, heta nefesê xo yê peyênî semedê ameyoxê heme domananê welatê xo wezîfeyê xo yê şorişî ardî ca.

Hemrayanê ma Şervîne, Canda û Nûcane ruhê dostîya raşte temsîl kerdêne. Qet nêtersayî, teredut nêkerd û bi ruhe vefa wezîfeyê xo ardî ca û tewr peynî de ganê xo feda kerd.

Ma sere de keyeyanê erjîyayeyan ê hemrayanê xo Fermandare Şervîne, Canda û Nûncane rê û heme şarê xo rê ke vera hêrişanê îşxalî têkoşîn keno û teslîm nêbeno, serweşîye wazenê.

Ma bi kede û gonîya hemrayanê xo yê sey Fermandare Şervîne, Canda û Nûcane herra welatê xo zulmê îşxalkeran ra xelisnaye. Ma do tim wayîrê mîrasê hemrayanê xo bivejîyê û qesasê înan bîgêrê. Ma do tim hêzdar û qerardar têkoşîn bikerê.''