Zaf şaristan û qezayanê Başûrê Kurdîstanî de 8ê Adare Roja Cinîyan ê Kedkaran a Dinya ame fîrazkerdene.

Hewlêr

Bi wesîleya 8ê Adare Roja Cinîyan ê Kedkaran a Dinya rayberîya Grûba Vengê Cinîyan de Hewlêr de çalakîyêke ameye kerdene. Endamanê grûbe nêrgîz û şekerî cinîyan rê vila kerdî û 8ê Adare yê înan fîraz kerd. Endama grûbe Selwe Cewher vat: ''Wezaretê Weşîye seba tebdîranê vera Korona waştbi ke çalakîyêke nêra kerdene. Ma goreyê bire têgêrayî û çalakîyê pîlî nêkerdî. Labelê bi wesîleya na roje ma çalakîyêka qijkeke kerde.''

Mexmûr

Kampa Multecîyan a Şehîd Rustem Cûdîyî (Mexmûr) de rayberîya Meclîsê Îştarî û Meclîsê Cinîyan ê Ciwanan de cinîyan bi kincanê xo yê tradesyonelan 8ê Adare fîraz kerd. Meydanê şayîye de ala û posterê Rayberê Şarê Kurdî Abdullah Ocalanî, alayê PKK, KCK, KJK, PAJK, YJA Star, TJA û pankartê bi nuşteyê ''8ê Adare fîraz bibo'', ''Seba vurnayîşî û azadîye wurzê payan ser'' ameyî akerdene. Çalakîye ra verî seba şehîdan deqayêk rêz ame girewtene. Nameyê Koordînasyonê Meclîsê Îştarî ser o Çîçeke Cengîz Urek qisey kerd û vat: ''Têkoşînê cinîyan her pareyê Kurdîstanî de wayîrê xoverdayîşî û destkewteyan bi. Şorişê Rojawanî zî îsbatê nê yo. Coka Şorişê Rojawanî, şorişê cinîyan o.''

Şengal

Cinîyanê Şengalî rayberîya Têgêrayîşê Azadîye yê Cinîyan ê Êzidîyan (TAJÊ) 8ê Adare bi coşêkê pîlî pêşwazî kerd. Cinîyê êzidîyî bi sloganan ver bi Sinûnî yê Şengalî şîyî. Cinîyan rayraşîyayîş de sloganê ''Cinîye, Cuye, Azadîye'' û ''Biciwîyo Rayber Apo'' vatî û çapikî dayî piro. Merasîmê rezgirewtişî ra dima vervatoxa TAJÊ Sabîha Sebrî, Hemsereka Heyetê Meclîsê Xoserîya Demokratîke ya Şengalî Rîhane Haco û fermandara YJŞyî Vîyane Hebabî qisey kerd. Qiseykerdoxan 8ê Adare yê pêro cinîyan fîraz kerd û bale ante ruhê xoverdayoxî yê Sarayan ser.