Seba tecrîdo ke Rayberê Şarê Kurdî Abdullah Ocalanî ser o yeno bicaardene wedarîyo û seba weşîye, azadîye û ewlehîya ey çalakîyê vêşanîye dewam kenê.

Grevê vêşanîye yê hemsereka KCD û parlamentera HDPyî Leyla Guvene kewt roja 68ine û bajaranê Hewlêr, Strasbourg, Newport de zî grevê vêşanîye dewam kenê.

Seba ke bale biancîyo talebanê çalakwanan ser û paştdarîye bidîyo înan, 16ê Çile de Strasbourg de çalakîya girseyîye do bêro organîze kerdene.

Çalakîye do saet 11.00 de adresa 1 Avenue du Président Robert Schuman, 67000 Strasbourgî de dest pê bikero.

KCDK-E derheqê çalakîye de beyanat da û beyanat de wina ame vatene: “Sazîyê mîyanwelatîyê ke bi bêvengîya xo desteg danê dewleta Tirkî û vera çalakîya Leyla Guvene û pêroyê çalakwananê bînan de zî bi bêvengîya xo erjanê merdimahîye gênê binê lingan û wijdanê merdimahîye dejnenê.

Ma do 16ê Çileyî,roja 70ine ya grevê vêşanîya Leyla Guvene, roja 57ine ya grevê Hewlêrî, roja 32ine ya grevê hepisxaneyan, roja 31ine ya grevê Strasbourg-Gallerî de muxatabî CPT, Konseyê Ewropa rê verê Parlamentoyê Ewropa de bi vengê girseyîye talebanê çalakwanan biqîrê û vengê xo biresnê nê sazîyan.

Ma sey KCDK-E û TJK-E wazenîme ke pêro kesê ke wayîrê wijdanî yê, cinî, ciwanî û pêro şarê xo yê şorişgêr, demokrat, roşinvîr û dostan dawetê na çalakîye kenîme.”