Hewteyê vîyarteyî de paytextê Îngilîstanî London de verê Sersefîrîya Almanya de kurdîstanijan bi çalakîyêka bêîteatîya sivîle qedexeyê vera PKKyî protesto kerdbî. La polîsan hêrişê çalakîye kerdbî û tay çalakîkerî destbend kerdbî. Çalakîkerî dima vera dîyayî.

Beşdaranê çalakîye derheqê armancê çalakîya xo de ANFyî rê qisey kerd.

Mustafa Amedo ke bi berzkerdişê ala PKKyî çalakîye kerdbî û amebi destbendkerdene vat: ''PKK terorîst nîyo. PKK seba heqê şaran têkoşîn keno. Ganî şarê kurdî eslê xo înkar nêkeno. Eslê ma PKK yo. Êyê ke PKKyî qedexe kenê nêeşkenê îradeyê şaran qedexe bikerê. Ma do tim vajê ke qedexeyê PKKyî wedarnê.''

Çalakîkerêkê bînî Kawah Mehabadî vat: ''PKK vera înkar û îşxalî têkoşîn keno. PKKyo ke vera faşîzmî şer keno, nêbeno terorîst. PKK şarê kurdî bi xo yo. Şer de bi hezaran domananê kurdan dinyaya xo bedilnaye. Dewleta Almanya îradeyê şaran bi qedexeyê PKKyî qedexe kena. Ganî cade PKK lîsteya terorî ra bêro vetene û no qedexe bêro wedaritene.''

Çalakîker Ako Mahabadî vat: ''Qedexeyê Almanya yê vera PKKyî nêno qebulkerdene. PKK û şarê kurdî yew ê.''

Cameran Şwanîyo ke Başûrê Kurdîstanî ra yo vat: ''Bi mîlyonan merdimî paştî danê PKKyî. Seba ke meseleya kurdan bi demokrasî çareser biba ganî qedexeyê vera PKKyî bêro wedaritene. Eke Almanya û Ewropa wazenê ke haştîye bêra caardene ganî PKK lîsteya terorî ra vejê.''

Nuştox Alî Poyrazî vat: ''PKK temsîlkarê şaran o meşrû yo. Ganî Almanya û Ewropa krîmînalîzekerdişê şaran ra fek vera bidê.''