Çalakîya roniştişî ya ke çarçewa Hemleya Wext Wextê Azadîye yo de 12ê teşrîna verênde bajarê Strasbourgî yê Fransa de verê Konseya Ewropa de semedê azadîya Rayberê Şarê Kurdî Abdullah Ocalanî ameye destpêkerdene, bi eşkerayîya çapemenîye qedîyaye.

Çalakîya ke hewteyo verên de hetê sîyasetmedar temsîlkaranê dezgehanê kurdan û tirkîyayîjan ra ameye destpêkekerdene, hewteyê dîyine de aktîvîstanê TJK-E ra ameye rayraberdene û hewteyo peyên de ciwanan dewr girewte. Xeylêk ciwanê enternasyonalîstî zî tewrê çalakîye bîye. Çalakîya roniştişî rîyê zêdbîyayîşê tedbîranê vera Korona ra rojêke verê wextê ci qedîyaye.

Eşkerayîye de bi nameyê ciwananê enternasyonalîstan Daniel Matrit qisey kerd û vat: ''Ma her hetê dinya ra semedê azadîya Ocalanî ameyî tîya. Ocalan 22 serrî yo binê esaretî de yo, no nîno qebulkerdene. Azadî û paradîgmaya Ocalanî semedê heme dinya zaf muhîm a. Ma do heta azadîya Ocalanî çalakîyan de bê. Şorişê Rojawanî hêvî dano ma. Ma do xoverdayîşê şehîdan bidê domnayene.''

Endamê Înîsîyatîfê Azadîya Ocalanî ya Globale Prof. Jose Maria Sison û Prof. Dr. Anurada Chenoy û mêrdeyê ci Prof. Dr. Kamal Chenoyî zî mesajê bi vîdeoyî şawitî. Mesaj de bale ameye antene serê muhîmîya rolê Ocalanî û azadîya ci ameye waştene.

Chenoyan vat: ''Ocalano ke rayber û vengê şarê kurdî yo ganî zîndananê tirkî ra bêro xelisnayene û kurdî bibê wayîrê statuyî. Paradîgmaya Ocalanî azadîya cinîyan û pîyaciwîyayîşê şaran esas geno. Dewleta tirke zana ke fikrê Ocalanî şarî ser o tesîr kenê coka tersena û bi tecrîdî wazena verê ci bigero. Sey Nelson Mandela û Gandî Ocalan zî xover dano. Wextê azadîya Ocalanî ame.'' 

Prof. Jose Maria Sison zî vat: ''Hurmetê heqê merdiman û edaletî ra ganî hemra Ocalan cade bêro veradayene. Têkoşînê antîemperyalîst û demokratîkî benê global. Têkoşînê xelisnayîşî yê kurdan eşkeno şorişê proleter-sosyalîstî yê dinya newe ra ganî bikero.''

Hemserê KCDK-E Yuksel Koçî zî vat ê çalakîya roniştişî qedînenê la çalakîyê înan do heme dinya de heta azadîya Ocalanî dewam bikerê.