Grevê vêşanîye yo ke vera tecrîdî, Bajarê Fransa Strasbourg de dewam keno kewt roja xo ya 28ine û Yewîya Suryanîyan a Ewropa zî tede xeylê sazî û bi seyan welatperwerî ameyî çalakwanan het û destegê xo nîşan da.
Seba ke roja yewşemeyî bîye Fransa û Almanya ra xeylî zîyaretkarî ameyî çalakwanê grevê vêşanîye yê ke bêwext û bêdore de yê zîyaret kerdî.
Dêrê Protestan ê bi nameyê Temple Neuf û Yewîya Suryanîyan a Ewropa yê Swîsre ra îdarekar Semîr Ozmen, Koln ra endamê Hereketê Yaşanacak Dunya, xebatkarê Kovara Jîneolojî û bajaranê Almanya Mannheîm, Pforzheîm û Stuttgart ra bi desan kesî, seba ke paştdarîye bidê çalakîye ameyî Strasbourg. Zîyaretê Kurdistanîyan zî dewam keno.
YAŞANACAK DUNYA: VERA HÊRIŞKARÎYE YEW XOVERDAYÎŞ O
Bi nameyê endamanê Hereketê Yaşanacak Dunya yew temsilkarî qisey kerd û wina va: “No xoverdayîş tena vera tecrîdî nîyo, pêroyê hêrişan rê yew cewab o û naye ra zî seba ma muhîm o. Grevê vêşanîye sey yew barîyer, vera hêrişê ke Şarê Kurd, sosyalîst-şorişgêran rê benê de vindenê û hetê mucadeleyî ra maneyêko pîl û erjaye yo.”
YEWÎYA SURYANÎYAN A EWROPA RA PAŞTDARÎYE
Zîyaretê temsîlkaranê YSE ra zî derheqê tecrîdo ke Rayberê Şarê Kurdî Abdullah Ocalanî ser o dewam keno de beyanat ame dayene û muhîmîya grevê vêşanîye ame vatene. Temsîlkaranê YSE muhîmîya mucadeleya şaran a şîrigkîye nîşan daye û va ma hêvî kenê ke no mucadele do ser bikewo.
Parlamentera HDPyî ya Riha ya verêne Dîlek Ocalane, hemsereka KCD-E Yuksel Koçe û sîyasetmedar Mustafa Sarikaya zî tede 14 kesî grevê vêşanîye de yê. Grevê vêşanîye 17ê Kanûne de bi yew beyanatê çalakîye ameybî destpêkerdene û adresa 7, Rue de la Broque 67000 Strasbourg de hîna zî dewam keno.
Îdarekarê Dêrê Protestanî zî vizêrî ameybî zîyaret û seba ke grev hîna cayêko baş de bêro kerdene pêşnîyazê xo nîşan dayî û va ma do no derheq de cad bikerê.
