Komployo Mîyanneteweyî yê vera Rayberê Şarê Kurdî Abdullah Ocalanî mîyanê kurdan de bi sebebê hêrsêkê pîlî.

17ê sibata 1999î de kurdan Berlin de verê temsîlkarîyanê hêzanê komplogeran de çalakîyê şermezarkerdişî kerdêne. Kurdan verê xo da Sersefîrîya Îsraîlî ya Berlinî. La girse dîya guleyan ver û welarperwerî Mustafa Kurt, Sema Alp, Ahmet Acar û Sînan Karakuş şehîd bîyî, bi desan welatperwerî û çend polîsê Berlinî zî birîndar bîyî.

Goreyê qiseykerdişanê têlsîzanê polîsan ê ke rojnameyê Spiegelî kifş kerdî, Sersefîrê Îsraîlî yê Berlinî Miriam Shomratî vato 'Ez şahîdê qirkerdişî ya.' La Wezîrîya Karanê Zereyî yê Almanya girseyê şarî sûcdar kerd û hukmatê Îsraîlî zî vengê sersefîrî birna. Hêzanê komplogeran bire daye ke qirkerdiş binimnê.

Şehîdanê a roje ra Ahmet Acar qezaya Bêrecukî ya Riha ra bi, babîyê 9 domanan bi. Kekê ci Kazim Acarî ANFyî rê qala birayê xo kerde û vat: ''Domanîya ma de oyo tewr bicoş o bi, her kesî tira hes kerdêne.''

Ahmet Acarî Ewropa de têgêrayîş şinasna, şi Merkezê Komelê Kurdan, kitabê Ocalanî wendî. Ahmet Acar bi hişmendî tewrê çalakîye bi. Kazim Acarî vat: ''Çalakîye ra rojêke dima seba destûrê roniştişî randevuyê ci estbi. A roje çew de kardî yan zî çeke çinbîye la Îsraîlî şar da guleyan ver. Îsraîlî no qirkerdiş plan kerdo. Almanya 45 deqayan ra dima ambulans şawit. Heta ê çaxî xora êyê ke merdê merî. Mehkemeyanê Almanya no qirkerdiş nimit. Dewa ameye qefilnayene, ceza nêdîyaye kesêkî, mexdûrîyetê keyeyan nêameyî çareserkerdene. Dewleta Almanya kurdî kerdî qurbanê têkilîyanê xo yê bi Îsraîlî.''

Qirkerdişî ra dima Rayîranê Heqayî yê Tirkan (THY) rixmo ke bîletî ameybî hêrînayene pare kerd ke ê do cenazayan nêberê. Kazim Acarî vat ke cenazayî bi rayîranê cîyayan ameyî berdene bi welatî la dewe de zî leşkeran verê înan girewt û cenazayî şewe ameyî definkerdene.

Kamîle Kurt: Perwerê Rayberîye bi

Şehîdanê çalakîya Sersefîrîye ra yew zî Mustafa Kurt o. Kurtî Ewropa de zîyaretê keyeyanê welatperweran kerdêne, zîyaretê dikandaran kerdêne û kovara Serxwebûnî vila kerdêne. Mustafa Kurt verî şaristanê Saarbruckenî de mend. O çax Kamîle reyde zewijîya.

Kamîle Kurt vat: ''Ma yewbînan ra hes kerd û zewijîyayî. La ey Rayberîye ra hes kerdêne, perwerê Rayberîye bi.''

Keyeyê Kurtî komployî ra di hewteyî ver Saarbruckenî ra şi Berlin. Mustafa Kurtî Berlin de zî karanê welatperwerîye rê dewam kerdêne. Kamîle zî komele de xebitîyayêne.

Kamîle Kurt zî heman çalakîye de birîndar bîye. Kamîle wina qala a roje kerde: ''Destê çewî de kardî, çû, çîyo bîn çinbi. Kincê înan zî nêdayî. Têna nasnameyê înan dayî. Mi têna waşt ke kincanê ey bigêra. Ez peyê na dewa de ya, heta destê mi ra bêro ez do tira fek vera nêda.''

Dezayê Ahmet Acarî Mehmet Acaro ke Şaredarîya Bêrecûkî de karmend bi, mergê Ahmetî ra karî ra ameyo vatene. Mehmet Acarî vat: ''Şaredarî venga mi da vat 'karmendîya to qedîyaya, ti do nika ra pey çopan arê bidî.' Eşkera yo fermandarê cendirmeyan no emr dayo. Wextê definê cenaza de înan verê şarî girewt ke tewrê merasîmî nêbo. Rixmê ney zî xeylêk kesî tewrê merasîmî bîyî. Fermandarê qereqolî apê mi û babîyê mi rê gef wend.''

Mehmet Acarî dîyar kerd ke kurdan rê tim zulm yeno kerdene û vat: ''Ma do têkoşînê şehîdanê xo rê dewam bikerê.''