Bi vengdayîşê Meclîsê Şarî yê Kurdan zaf şaristananê Brîtanya de bi hezaran kesî kom bîy û înan seba 2ê Teşrîna Peyêne ya Roja Rojawanî ya Dinya çalakîyî kerdî. Nuştoxî, akademîsyenî, karkerî, cinîyî, ciwanî tewrê çalakîyan bîy. Çalakîyan de Dewleta Tirkan a îşxalkere û serekkomarê Tirkîya Erdogan ameyî şermezarkerdene.

Londra

Paytextê Îngîlîstanî  Londra de bi hezaran kesî meydanê Marble Archî de kom bîy. Sendîkayanê Îngilizan ra heta fîlîstînîjan, anarşîstan ra heta antî-kapîtalîstan zaf kesî tewrê ci bîy. Çalakîkerî dima ver bi meydanê Trafalgarî şî. Rayîrşîyayîşî de seba boykotkerdişê Tirkîya vilawekî ameyî vilakerdene. Hayko Bagdatî zî meydan de qisey kerd û vat planê qirkerdişî yo ke se serran ra verê armenîyan ser o ameybî tetbîqkerdene, nika zî kurdan ser o yeno tetbîqkerdene.

Dîrektorê Mîyanneteweyî yê Sendîkaya UNITE Sîmon Dubbînsî vat: "Armancêkê nê hêrişan xelisnayîşê çeteyanê DAÎŞî yo. Ma do têkoşînê xo yê vera îşxalkeran û çeteyan dewam bikê."

Hemserekê Mesclîsê Şarî yê Kurdan Enver Muslîmî zî pê telefonî beşdaran reyde qisey kerd û vat ke armancê Dewleta Tirkan vurnayîşê demografîyê Rojawanî yo û vera naye xoverdayîşêko pêt yeno kerdene.

Lîverpool

Lîverpool de zî bi seyan kesî kom bîy û bi pankartê "Rojawanî bipawe" rayîr ra şîy. Rayîrşîyayîş de sloganê "Terorîst Erdogan" ame vatene.

Brîghton

Şaristanê Brîghton de komê antî-faşîstî û şar salonêke de hem Roja Rojawanî fîraz kerde hem zî derheqê Rojawanî de panelêk serûber kerd. Panel de sîstemê konfederalîye yê kurdan ame munaqeşekerdene. Sheffîeld de bi seyan kesî verê bînaya şaredarîye de kom bîy. Çalakîye de seba Rojawanî sloganî ameyî vatene û vilawekî ameyî vilakerdene. Çalakîye de ame waştene ke Tirkîya bêra boykotkerdene.

Hull
Şaristanê Hullî de zaf kesî meydanê Vîctorîa de kom bîy. Çalakîye de vilawekî ameyî vilakerdene û seba boykoykerdişê Tirkîya veng ame dayene.