Serekê Organîzasyonê Pawitişê Qanûnî ê Almanya Hans-Georg Maaßenî ‘Focus Online’ rê qisey kerd û derheqê şûbeyê rejîmê Erdoganî DÎTÎB ê Almanya de ro xo rona.

Şefê verênî derheqê melayanê DÎTÎB’î (Yewîya Îslamî ya Tirkî ya Karê Dîyanetî) de vat, “Ameyêne zanayene ke ê karê îstîxbaratî kenê, hayîdarîyan danê pêser û sazîyanê Tirkan rê şirawenê.”

‘Ganî Îstîxbarat Nizd ra DÎTÎB’î Bişopno’

Maaßenî vat xebatê ajanîye yê melayanê Tirkan hêrişê serê xoserbîyayîşê dewlete yê û wina domna, “Goreyê mi ewnîyayîşê dînî yo îdeolojîk ê DÎTÎB’î û ercê dmokratîkî ro yewbînan nênê. Naye ra Organîzasyonê Pawitişê Qanûnî ganî nê organîzasyonî nizd ra bişopno. Helbet na babete de qeraro peyên ê îradeyê sîyasîyî yo.”

Çeleya ravêrtî de seba ke DÎTÎB bi temamî Enqereyî rê bêro girêdayene, sereko pêroyî û hetkarê serekê pêroyî rasterast hetê rejîmê Erdoganî ra ameybî tayînkerdene. Ê muşawirê Xizmetê Dînî yê Seferatê Tirkî yê Almanya Kazim Turkmen ardibi serê serekîya DÎTÎB’î û mabênê 2014-2017 de zî na serekîye destê Ateşeyê Xizmetanê Dînî yê Konsolosxaneyê Tirkî yê Kolnî Ahmet Dîlekî de bi.

‘Dosyaya Melayanê Ajanan Amîbî Panayene’

Gama ke mabênê rejîmê Erdoganî û hukmatê Merkele 2017 de bib xira, bi belgeyan vejîyabi werte ke melayê DÎTÎB’î senî MÎT’î rê xebetênê û binê nameyê weazan de senî propagandaya Erdoganî kenê. A game Organîzasyonê Pawitişê Destûrî yê Eyaletê Ren Vestfîlya yê Vakurî 13 melayê ajanî tespit kerdîbî û eştibi keyeyanê înan ser. La dimayo ke bazarîyî rejîmê Erdoganî dir ameyî kerdene dosyaya cipersayîşî ya DÎTÎB’î amîbî panayene.