Bajaranê Hannover û Mainzî yê Almanya de verê kanalanê televîzyonan de çalakîyê protestokerdişê çekenê kîmyewîyan ê dewleta tirke û bêvengîya vera nê hêrişan ameye şermezarkerdene.

Hannover de Yewîya Wendekaran ê Kurdîstanî (YXK),  Cinîyan ê Wendekaran ê Kurdîstanî (JXK) (JXK) û ciwanan ê enternasyonalîstan çarçewa Hemleya ''Werin Cenga Azadiye'' de çalakîya bêîteatîya sîvîle kerde. Ciwanan verê kanalê radyo û televîzyonî yê NDRyî de hêrişê kîmyewîyî yê dewleta tirke yê vera Kurdîstanî şermezar kerdî. Ciwanan pankarta ''Tirkîya pê gazî kişena, Almanya zî fîanse kena'' akerde û waşt ke şirê zere la destûr nêdîya. Selahîyetdaranê kanalî ra kesêk ame teber û ciwanan reyde qisey kerd. Ciwanan derheqê babete de dosyayêke daye ci.

Mainz de zî  hetê Têgêrayîşê Ciwanan ê Şorişgêran  (TCŞ), Cinîyan ê Ciwanan ê Têkoşeran (TekoJIN) û ciwananê enternasyonalîstan ra bi eynî waştişî çalakîyêka bêîteatîya sîvîle ameye kerdene. Ciwanan verê kanalê radyo televîzyonî yê SWRyî de şuxulnayîşê çekanê kîmyewîyan û hêrişê îşxalî yê dewleta tirke şermezar kerdî. Rixmê mudaxaleyê polîsan ciwanan dosyayêke teqdîmê selahîyetdaranê kanalî kerd.