Aktîvîstê kurdê ke Almanya de bi madeyê 129/byî  yenê muhakemekerdene raştê neheqîya pîle yenê. Tepişteyan ra Mazlûm Dora û Merdan K. yê ke roniştişê dewaya înan 3 û 4ê tebexe de ameyî kerdene, pa kelemçeyan ardîyayî mehkeme.

Merdan K.yo ke elûla 2021î ra nata Zîndanê Stammheimî yê bajarê Stuttgartî yê Almanya de yeno tepiştene roniştişê ci yê 23. ame kerdene. Merdan K.yo ke sey kadroyê PKKyî yeno sûcdarkerdene mehkeme de pêvînayîşê ci yê telefonî ameyî goştarîkerdene. Heyetê mehkeme qiseykerdişê ey bi dayîka ci yê sey 'ez vêşana werd est o, ez û embazê xo yenê' sey falîyetê rêxistinkî  hesibaneyî. Roniştişo bîn do 9ê tebaxe de bêro kerdene.

Mazlûm Dorayo ke eynî zîndan de yeno tepiştene û  15 aşmî yo yeno muhakemekerdene roniştişê dewaya ey zî 3ê tebaxe de ame kerdene. Mehkeme de xeberê ke medaya tirkan de vejîyayî sey delîlê sûcî ameyî hesibaneyene. Reyna seba ke Dorayî di serrî verî semedê klîbî kincê neteweyî kerdî piray no zî sey sûcî ame hesibnayene. Roniştişo bîn do 31ê tebaxe de bêro kerdene.

Almanya de 9 aktîvîstê kurdî tepişte yê. Înan ra dewaya Gokmen Ç. û Veysel S.yî qedîyaye. Cezaya 2 serran û 4 aşmanan dîyaye wird tepişteyan. Roniştişê Mazlum Dora, Mirza B., Merdan K. û Abdullah Ocalanî dewam kenê û roniştişê dewayanê Ali O., Ali E., Ozgur A.yî hema dest pê nêkerd. Aktîvîsto kurd Mustafa Çelîko ke 2 serrî û 7 aşmî zîndan de mend çend rojî verî Zîndanê Bremenî ra vejîya. Çelîk do 5 serrî binê kontrolî de bimano.