Rayber xoverdayîşê Dêrsimî Seyîd Riza, lajê ci û 5 rayberê eşîranê Dêrsimî 15ê teşrîna peyêne ya 1937î de hetê dewleta tirke ra Meydanê Bugdayî  yê Xarpêtî de ameybî dardekerdene.  Paytextê Almanya Berlin de Yewîya Hêzê Demokratîkî ya Ewropa (ADGB) bi wesîleya serrgêra dardekerdişê Seyîd Riza û embazanê ci bi şîarê 'Ma xo vîr a nêkerd, anê vîrardene , xo vîr a nêkene' verê Sersefîrîya Tirkîya de çalakîye kerde.

Çalakîye de Endamê Meclîsê Nav-Berlinî Mazlûm Karagozî bi nameyê ADGByî qisey kerd. Karagozî vist vîrî ke polîtîkaya qirkerdişî ya dewleta tirke ewro zî dewam kena û vat: ''Çi heyf ke dewleta tirke tim redkar û înkarkar a. Dewletê Ewropa wextê Seyîd Rizayî ra nata polîtîkayanê leymiman ê şerî yê dewleta tirke rê çimê xo girewtî. Ewro Başûrê Kurdîstanî de çekê kîmyewîyî yenê şuxulnayene la heme dewlete bêveng ê.''

Dima ra bi nameyê Kongreya Ronayîşî ya Dêrsimî qiseykerdişêk ame kerdene û nê ameyî vatene: ''Ma Dêrsim xo vîr a nêkerd û do medê vîrakerdene. Terteleyê Dêrsimî ewro zî dewam keno. Ma zî do rêçê pîranê xo de sereberz têkoşîn bikerê. Dêrsim zerrîya Kurdîstanî ya. Heta ke Dêrsim bibo, heta ke kurdî bibê ma do terteleyî xo vîr a nêkerê. Heta ke dewleta tirke nê dir bêro têrî.''

Eşkerayîyan ra dime verê Sersefîrîya Tirkîya  de çelenko sîya ame ronayene.