Bajarê Çelle yê Almanaya de Mam Zekî Şengalî (Îsmaîl Ozden)  yo ke 15’ê Tebax a 2018’î de hêrişê hewayîyî yê dewleta Tirkî de şehîd bi û fermandaranê HPG’yî ra  Atakan Mahîro  ( Îbarhîm Çoban) ke  11 ‘ê Tebaxe de Dêrsim de şehîd bi pîya bi gerîlayanê ke pîya şehîd kewtî ameyî vîrardene.

Vîrardişo ke Mala Êzidî de ame viraştene de xeylî Kurdistanijî û dostê înan tewrê ci bîyî. Bi nameyê Komîteya Amadakarîye, Koordînasyonê Êzidîyan ê Teberê Welatî û Komîteya Bawerîye ya Mezopotamya qiseykerdişî ameyî kerdene. Reyna lajê Mam Zekîyî Edîp Ozdenî û detkênaya Dîyar Xerîbî  qisey kerd û mesajê girdkerdişiê xoverdayîşî dayî.

Dimayê pêramotişê sînevîzyonî yo ke derheqê Mam Zekî û Atakan Mahîr de ame amadakerdene aktîvîsta  Têgêrayîşê Cinîyan ê Kurdan ê Ewropa (TJK-E) Zozan Serhate qisey kerd. Serhate şexsê Mam Zekî, Dîyar Xerîb û Atakan Mahîrî de heme  şehîdî yad kerdî û va: ‘’ 15’ê Tebaxe destpêkerdişê cuyayêka neweye  û serrgêra ganîbîyayîşê ma yo. Tarîxê Kurdan Şengal de bi Êzidîyan zergûn bi.’’

Bado zî sîyasetmedaro Kurd Ramazan Îmîro ke vera tecrîdê serê Rayberê Şarê Kurdî Abdullah Ocalanî grevê vêşanîye de ca girewt, qisey kerd. Îmîrî vat: ‘’ Têgêrayîşê Azadîye bi şîarê ‘’Kurdistan binê îşxalê zorbayan de yo’ dest bi mucadeleyî kerd. Guleyo verêno ke bi Egîtî dest pêkerd bi Mam Zekîyan dewam keno. No gule vera xîyanet, teslîmîyet û îşxalî yo. Ma soz danê şehîdan ke do mucadeleyê înan bêmabên bêro dewamkerdene.’’

Dimayê Îmîrî binameyê MŞD, KCDK-E, NAV-YEK, KON-MED, KOMAV, Mala Êzidî û TEV-ÇAND’î qiseykerdişî ameyî kerdene. Qiseykerdişan bale ameye antene serê kedê şehîdan, 15’ê Tebaxe ame silamkerdene û sozê xurtkerdişê mucadeleyî ameyî dayene.