Hemserekê Merkezanê Komelê Demokratîkî yê Fransa (CDK-F) Murat Ceylanî vera hêrişê polîsanê Fransa yê serê çalakîkeranê kurdan nêrazîbîyayîşê xo mojna.

Murat Ceylanî babete ser o eşkerayîyêke daye û vat: ''Ma nê hêrişê barbarî yê Fransa yê vera çalakîya demokratîke ya kurdan şermezar kenê. Şarê kurdî 22 serrî yo başe anceno tecrîdê vera Rayber Apoyî. Şarê ma semedo ke Konseya Ewropa, MHME û CPT tîya de yê qey şiknayîşê tecrîdî 22 serrî yo verê bînaya înan de çalakîyan keno û sozan gêno.

Naye ra pey tecrîdê vera Rayber Apoyî binê çimdarîya Konseya Ewropa û CPTyî de dewam keno. Yanî no yeno a mana ke pawitişê înan ê Tirkîya dewam keno. Ewro Fransa çalakîyêka demokratîke ya kurdan rê tehamul nêkerde. A raşte hêrişê înan o ewroyîn xizmetê dewleta tirke ya îşxalkere, dewletanê îşxalkeran û hişmendîya DAÎŞî keno.

Ewro Fransa sey DAÎŞî bi hawayêkê barbarî nêzdîyê temsîlkaranê têgêrayîşê bi ke nê têgêrayîşî vera DAÎŞî şer kerdbi. Ma nê xoverdayîşê şarê xo selam kenê û vanê ke qetî dewleta tirke ya faşîste û hemkarê ci do bin bikewê. Xoverdayîşê azadî û demokrasî do ser bikewê.''