Xeylêk şaristananê Ewropa de Newroze bi coşî yena fîrazkerdene.

Şaristanê Viyana yê Avusturya de hetê Federasyonê Komeleyanê Kurdan ê Avusturya (FEYKOM) ra şayîya Newroze ameye kerdene. Şayîye de mesajê vîdeoyî yê Hemserekê Konseya Rayberdişî ya KCKyî Cemîl Bayikî ame wendene û sînevîzyonêk ame mojnayene. Şayîye de Besere Şahîn, Ayşe Şevaqî, , Seyda Perînçek, Tiyatro Potamiya û Koma Rojava vejîyayî sehne ser.

Şaristanê Erfurtî yê Almanya de komêka kurdîstanij û enternasyonalîstan roşanê Newroze bi şayîyêke fîraz kerd. Şayîye 4 saetan dewam kerd.

Şaristanê Donostî yê herêma Baskî de Komîteya Paştdayîşî ya bi Kurdîstanî şayîyêka Newroze serûber kerdene. Şayîye de kargehê jineolojî û konfederalîzmê demokratîkî zî ameyî kerdene.Beşdaran pîya katalankî, spankî, kurdkî, baskî û îtalyankî deyîrî vat û govende girewte.