Covid-19: Ewropa de tewr tay 55 kurdîstanijî merdî

Pandemîya Covid-19î ya ke Çîn de vejîyaye werte û pêro dinya de vila bîye Ewropa de tewr tay 55 kurdîstanijî tira merdî, nêzdîyê hezar kurdî zî pê vîrusî kewtî.

Pandemîya vîrusê Korona ra parzemînê Ewropa de bi desan kurdîstanijan dinyaya xo bedilnaye. Tewr zaf Almanya, Fransa, Belçîka, Îngîlîstan, Hollanda û Swîsre de vîrusî tesîrê kurdan kerd.

Ewropa de tewr zaf Almanya de kurdistanijî ciwîyenê ke hûmara înan mîlyonêk û 500 hezar a. Horeyê îstatîstîkanê KCDK-E welatanê Ewropa de heta nika 55 kurdîstanijan dinyaya xo bedilnaye û tewr tay 955 kesî pê vîrusî kewtî. Serrîya qurbanan bi giranî dormeyê 60 serrî ya labelê domanêko 4 serre zî merdbi.

Tewr zaf Îngîlîstan de kurdîstanijî vîrusî merdî. Dima zî Almanya, Swêd û Fransa de bîyî qurban. Goreyê doneyanê KCDK-E tablo wina yo:

Kurdîstanijê ke welatanê Ewropa de vîrusî ra merdî

Almanya: 11

Îngîlîstan: 20

Swêd: 10

Fransa: 9

Belçîka: 5

Hûmara Nêweşan

Îngîlîstan: 350

Almanya: 300

Fransa: 90

Hollanda: 54

Swêd: 45

Belçîka: 42

Swîsre: 37

Awusturya: 34

Danîmarka: 5

Kanada: 1

Êyê ke binê karantîna de yê

Îngîlîstan: 80

Swêd: 14

Fransa: 11

Hollanda: 7

Belçîka: 5

Kampanyaya 'Keyeyê Wayeûbirayî' ya Heyva Sor a Kurdîstanî

Heyva Sor a Kurdîstanî çarçewa têkoşînê vera vîrusî de dest pê 'Kampanyaya Keyeyê Wayeûbirayî' daye. KCDK-E û TJK-E paştî danê kampanya. Dezgehê hetkarîye ra Murat Vargunî pare kerd ke ê do hetkarîya keyeyan ê mexdûran ê 4 parçeyanê Kurdîstanî bikerê û vat: ''Kampanyaya ma vizêr dest pêkerd. Almanya, Swîsre û Hollanda ra tewrbîyayîşî estê, heta nika 150 kesî tewrê kampanya bîyî.'' Vargunî venga her kesî da ke tewrê kampanya bibo.

Konfederasyonê kurdan KON-MEDê Almnaya zî pê rayîrê masayanê krîzî xîret keno ke hetkarîya kurdîstanijan bikero. Hetê weşîye, huqûqî û malîyî ra xizmetê şêwirmendîye pêşkêş keno. Binê sîwana konfederasyonî de 12 doktorî xizmet kenê.

Sere de Berlin, Koln, Hamburg zaf şaristanan de masayê krîzî ameyî awankerdene. Hemserekê KON-MEDî Tahîr Koçerî eşkera kerd ke Almanya de mîlyonêk û 500 hezar kurdî estê û ê wazenê ke hetkarîya merdiman ê hewcedaran bikerê.

Fransa de Komelê Demokratîkî yê Kurdan (CDK-F) hem werd dano xebatkaranê weşîye hem zî seba nînan maskeyan virazeno. Sey Swîsre û Îngîlîstanî zaf welatanê Ewropa de kurdî hetkarîyanê winasîyan kenê.

Hemserekê KCDK-E Yuksel Koçî da zanayene ke ê rewşe her roje teqîb kenê û venga komelî da î vat: ''Bi taybetî ganî ma hetkarîya kokiman bikerê. Maske zî tede ma seba afernayîşê îmkanan xîret bikerê. Bi nê hawayî ma paştdayîş xurtêr bikerê û heqê nê krîzî ra berê.''