Ciwanê kurdî Mazlum Dag û Abdurrahman Er Başûr de dimayê serebûto ke 17ê temmuza 2019î de Hewlêr de qewimîyabi pê tedaya dewleta tirke ameyî tepiştene û cezaya îdamî dîyaye înan.

Apê Erî Necmettîn Er û lajê xala Erî Yilmaz Polatî derheqê prosesî de ANFyî rê qisey kerd û waşt ke vera ciwanan binpaykerdişê heqan biqedo. 

Necmettîn Erî da zanayene ke Mazlum Dag û Abdurrahman Er bi îdîaya ke ajanê MÎTî Osman Kose kişto ameyî muhakemekerdene û cezaya îdamî dîyaye înan. Erî vat: ''Zîndanê Hewlêrî de pêvînayîşê keyeyan, şawitişê mektube, hetkarîya pereyan û kincan yenê astengkerdene. Er û Dag vera nê kerdişan roja şemeyî ra nata grevê vêşanîye de yê.''

Necmettîn Erî venga îdareyê Hewlêrî û dezgehan da û vat: ''Hînî ciwananê kurdan rê zulm mekerê.''

Yilmaz Polatî zî îfade kerd ke bira îdamî birêka raşte nîya û vat: ''Îdareyê Hewlerî goreyê menfaatanê dewleta tirke têgêreno. Îdare tewiro ke nêmojneno tepişteyanê cerganê DAÎŞî mojneno Er û Dagî. Ganî ciwanê kurdî pê destê kurdan nêrê kiştene. Ma venga rêxistinanê heqanê merdiman û rayaumûmîya mîyanneteweyîye danê ke wa bala xo bidê na mesele ser.''