Ewropa de tecrîd yeno protestokerdene
Seba bale antişê grevanê vêşanîye yê ke seba wedartişê tecrîdê girankerdeyî yê serê Rayberê Şarê Kurdî Abdullah Ocalanî yenî viraştene, çalakîyê paştîdayîşî zêdîyene.
Seba bale antişê grevanê vêşanîye yê ke seba wedartişê tecrîdê girankerdeyî yê serê Rayberê Şarê Kurdî Abdullah Ocalanî yenî viraştene, çalakîyê paştîdayîşî zêdîyene.
Çalakîyê paştîdayîşê grevê vêşanîye yo ke seba wedartişê tecrîdê Îmrali yeno viraştene, dewam kenî.
DUISBURG
Bajarê Duisburgî yê Almanya de zî seba bale antişê tecrîd û grevê vêşanîye çalakîya bêîtaatîye ya sivîlî ameye viraştene. Rayberîya cinîyan ciwanan de bi meşaleyan û posteranê PKK, KCK û Ocalanî rayraşîyayîşêk ame viraştene.
FRANKFURT
Bajarê Frankfurtî yê Almanya de hetê Meclîsê Cinîyan ê Amara û Meclîsê Cinîyan ê Hanau Nujîne vernîya partîya SPDyî de çalakîyêk ameye viraştene. Çalakwanan dosyayêk teqdîmê kerde û înan ra waşt ke wa vera tecrîd û grevê vêşnayîye bêveng memanî.
AARAU
Bajarê Aarau yê Swîsre de rayberîya Meclîsê Cinîyan ê Rojbîne de Parîtya Sosyalîst,Kilîseyî û radyoyê cayî ameyî zîyaretkerdene û derheqê tecrîd û grevê vêşanîye de dosyayî ameyî dayene.
BORDEAUX
Bajarê Bordeauxî yê Fransa de zî rayberîya Têgêrayîşê Ciwananê Şorişgêrî de çalakîya bêîtaatîye ameye viraştene. Çalakwanan pankartê ‘Ocalanî rê azadîye‘ kirişt û bi sloganan bale ante tecrîd û grevê vêşanîye ser.
CARDIFF
Paytextê Gallerî Cardiff de zî bi çalakîyêk grevê vêşanîye ameyî silamkerdene û bêvengîya Ewropa ameye şermezarkerdene.
LONDRA
Paytextê Îngîlîstanî Londra de zî bi heman waştişî vernîya parlamento de çalakîyêk ameye viraştene. Çalakîye de çalakwanê grevê vêşanîye ameyî silamkerdene û mesajê ‘‘Waştişê xoverdayoxan, waştişê ma yo‘‘ ame dayene.
MARSÎLYA
Bajarê Marsîlya yê Fransa de seba şiktişê tecrîdê girankerdeyî yê serê Rayberê Şarê Kurdî Abdullah Ocalanî û bale antişê grevê vêşanîye ciwananê Kurdan rasteyê teyareyan de çalakîya bêîtaatîye ya sivîlî viraşte.
Reyna seba bale antişê grevê vêşanîye çalakîyêka bînî zî Marîgnan de ameyî viraştene. Çalakîye de ame vatene ke bedele ci çi beno wa bibo ciwanî tim kişta Ocalanî de yê û ê do her tim meydanan de bê.