Çalakîyê bi çarçewaya kampanyaya Rayberê Şarê Kurdî Abdullah Ocalanî rê azadîya ke sendîkayanê Brîtanya yê bi mîlyonan endamê xo estê, dewam kenê.

Bi dîyarkerdişê Festîvala Madendaranê Durhamî, Kampanyaya Ocalanî rê azadîye kewte merheleya neweye, emser zî menga Temmuze de bi paştdayîşê Festîvala Şehîdanê Tolpuddleyî ya ke Başûrê Îngîlîstanî de do bêra viraştene, derbazê merheleyêka bîne do biba.

Seba azadîya Ocalanî peyamî do bêrê dayene

Festîvala Şehîdanê Tolpuddleyî ya ke her serre bi beşdarbîyayîşê des hezaran aktîvîstanê sîyasî, endamanê sendîkayan û endamanê Partîya Karkeran yena amadekerdene, mabênê 19-21'ê Temmuze de bajarekê Tolpuddleyî yê herêma Dorsetî de do bêra viraştene.

Yeno pawitene ke bi seyan Kurdistanijî zî festîvale de amade bibê.

Festîvala ke serekê Partîya Karkeran Jeremy Corbyn û girêdayîyê partîye do tewrê ci bibê,  derheqê kampanyaya Ocalanî rê azadîye de qiseykerdiş û aktîvîteyî do bêrê kerdene.

Girdbîyayîşê kampanya zaf muhîm o

Hemserekanê Meclîsê Şarê Kurdan ê Brîtanya Ercan Akbal û Besîme Başare vat, “No wexto ke şarê Kurdî şexsê Leyla Guvene de her cayan de çalakîyanê grevê vêşanîye û çalakîyanê cîyayan keno, ke nê seba rojdembîyayîş û wedaritişê tecrîdê Rayberê Şarê Kurdî Abdullah Ocalanî yenê viraştene, ma dewamkerdişê paştdayîşê seba kampanyaya Ocalanî rê azadîye yê sendîkanyan muhîm vînenê.”

Doskley: Ma sereberz ê

Sekreterê Kongreya Sendîkayan (TÛÇ) ya Herêma Başûrê Rojawanî Nîgel Doskleyî bi nameyê Komîteya Tolpuddle qisey kerd û vat, “Seba ke ma tewrê Kampanyaya Ocalan rê azadîye bîyê ma sereberz ê.”