Şaristanê Bordeauxî yê Fransa de aktîvîstanê Têgêrayîşê Ciwanan ê Şorişgêran çarçewa Hemleya Bêrê Cengê Azadîye de hêrişê dewleta tirke yê vera kampa êzidîyan a Qadîya protesto kerd. Ciwananê kurdan verê Sersefîrîya Tirkan de pankarta 'Dewleta tirke ya kiştoxe do hesab bida' daliqnaye.

Şaristanê Parisî de zî aktîvîstanê TCŞyî zî çarçewa heman hemle de hêrişê vera kampa Qadîya pê çalakîya rayraşîyayîşî protesto kerde. Çalakîye de pankartê 'Terorîst Erdogan', 'Biciwîyo Serek Apo', 'Qesas', 'Biciwîyo xoverdayîşê Şengalî' ameyî kiriştene. Ciwanan rayîr girewt û venga hukmatê Fransa da ke vera nê hêrişan bêveng nêmano.