Çalakwanê grevê vêşanîye vizêr hetê sîyasetkar û parlamenterê Kurdan ê ke sirgûn de yê ra ameyî zîyaretkerdene.

Sîyasetkaro Kurd Hatîp Dîcleyo ke zîyaret de qisey kerd nê vatî: “Serkêş, mezg û raybero stratejîk ê nê şorişî Abdullah Ocalan o. Heme dinya nê zana. Ewro ma fînal de yê. Xusûsen şexsê Leyla Guvene de ma nê prosesî de şerê rûmet û şerefî danê û ma na çalakîya ke embazan seba wayîrvejîyayîşê Serek Apoyî daya destpêkerdene silam kenê.

Teberê 15 embazanê ma yê tîyayî zîndanan de 126 embazê ma bi heman waştişî paştî danê Leyla Guvene û nê çalakîyan birûmet domnenê. Ewro zî dimayê derbeyê faşîstî yê 12ê Êlule ra bloka faşîste ya AKP, MHP û Ergenekonî rîyê 12ê Êlule temsîl kena.”  

Dîcleyî dewam de wina qisey kerd: “Çalakîya Kemal Pîr, M. Hayrî Durmuş û embazanê înan a hemverê dîktatorîya faşîste ya 12ê Êlule 40 serrî ra dima hetê hemrayanê înan ra amîya dewrgirewtene. Înan o wext zî waştêne ke Kurdan tasfîye bikerê la ê kewtî merheleya rijîyayîşî.”  

Dîcleyî peynî de nê vatî: “Ez şima sey temsîlkarê hemleya pîle ya ke beyraqtarîya ci Leyla Guvene kena zerrî ra pîroz kena. Ez bawer kena senî şarê Kurdî hemrayê Kemal û Hayrî nêkerdî xo vîr ra do wina paştî bidê çalakîya ke seba wedartişê tecrîdê serê Serek Apoyî amîya destpêkerdene. Naye rê bawerîya mi tam a.”

Roja 21. ya grevê vêşanîye de Federasyonê Yewîya Dêrsimî ya Demokratîke, hemsereka Meclîsê Partîya Çepe yê Hamburgî Cansu Ozdemîre, sîyasetkarê Kurdî Hatîp Dîcle, Ahmet Kahraman, Lezgîn Botan, Tugba Hezere, Nursel Aydogane, Leyla Bîrlîke, endamê YXK û JXKyî, Meclîsê Şarî yê Çekya, endamê meclîsê şarî yê Polonya, Almanya ra yê Dresden, Hamburg, Hannover, Salzgîtter, Munîh, Stuttgartî û Swîsre ra yê Bern, Baselî, Têgêrayîşê Mereşî, waya Hayrî Durmuşî Ayten Durmuşe û xebatkaranê Medya Haberî çalakwanan zîyaret kerdî.