Grevê vêşanîye yê Strasbourgî ke 26 rojî xo dima verdayî, ci rê zîyaretê paştîdayîşî dewam kenî. Akademîsyen Dr. Osman Îsmaîl û gazîyanê Rojawanî ra Şoreş Serekanîye yê ke Londra de ciwîyenê, çalakwanî zîyaret kerdî.
Grevê vêşanîye yê bêwext-bêdore yê Strasbourgî yo ke vera tecrîdê serê Rayberê Şarê Kurdî Abdullah Ocalanî yeno viraştene roja xo ya 26îne xo dima verda. Roja 26îne de bajaranê Dortmund, Mannheim û Kehle yê Almanya û Bregenzê Avusturya, Lyonê Fransa ra xeylê emdamê meclîsê şarî ameyî zîyaret. Zîyaretkaran waşt ke wa Komîteya Vernîgirewtişê Îşkenceyî (CPT) wezîfeyê xo bikero.
Şoreş Serekanîye yo ke gazîyê Rojawanî yo zî Strasbourg de ame zîyaretê çalakvanan û vat ke ganî ma her ca de mucadeleyê xo xurt bikerê. Serêkaniyeyî bale ante xoverdayîşê hepisxaneyan ser û waşt ke wa şar wayîrê xoverdayîşê Leyla Guvene û pêroyê hepisxaneyan bivejîyo.
Doktorê Hiqûqî yê Mîyanwelatîyî Osman Îsmaîl zî Îngilîstan ra seba ke paştîye bido çalakvanan ame Strasbourg û çalakvanî zîyaret kerdî.
Dr. Osman Îsmaîlî va: ''Terîdo ke Ocalanî rê yeno kerdene nêno qebulkerdene û vera tecrîdî mucadeleyo ke bi grevê vêşanîye yeno kerdene meşru yo. Pêroyê parçeyanê Kurdîstanî de mucadeleyê azadîye yeno dayene û mabênê parçeyan de ferqe çin o.''
