Hemşaredarê Pêrî: Qeyûm do nêeşko vernîya ma bîgêro

Hemşaredaranê Pêrî ya Dêrsimî Songule Dogan û Orhan Çelebîyî vat ke qeyûm do nêeşko asteng biko ke ê şarê rê xizmet bikê.

13ê teşrîna peyêne de Hemşaredarê Bajarekê Pêrî yê Qezaya Mazgêrdî ya Dêrsimî yê HDPyî Orhan Çelebî û Songule Dogan wezîfeyê xo ra ameybî girewtene û herinda înan de qeyûm amebi tayînkerdene. Dormeyê şaredarîya ame girewtene û dekewtiş û vejîyayîşê şardarîye de kontrolê nasnameyî yeno kerdene.

Vera qeyûmî hemşaredaran nêrazîbîyayîşê xo mojna û dest pê çalakîyanê protestoyî kerd. Hemşaredarî her roje taxe bi taxe, dewe bi dewe gêrenê û şarî reyde têkilîye dewam kenê. Songule Dogan û Orhan Çelebî derheqê qeyûmî de waştişanê şarî de Ajansê Mezopotamya reyde qisey kerd.

Hemşaredar Orhan Çelebîyî ard ziwan ke derheqê ey de serra 2017î de seba parekerdişê medyaya komelkî dewayêke ameye akerdene û a dewa ra serkewte wezîfeyê xo ra amebi dûrvistene. Çelebîyî îfade kerd ke qeyûm bêhuqûqîye yo û hema zî teblîgatêk nêresa destê înan. Çelebîyî vat: "Ma verê cû zî dî ke qeyûmî şaredarîyan visnenê binê deynan, talanan û zulman. Qeyûmo ke herinda ma de ame tayînkerdene zî hewteyêkî ra nat xizmet nêdano şarî. Ma pêro meseleyê taxan tesbît kerdibî û projeyî amade kerdibî. Ma kerdêne ke rayîrî newe ra bivirazê. Ma seba meseleyanê şarê xo do pîya çare bibê. Heta ke ma îradeyê xo apey bigêrê ma do têkoşînê xo dewam bikê."

Hemşaredare Songule Dogan pare kerd ke îqtîdar seba ke bi weçînayîşan şaredarîye nêgirewte bi qeyûman xesp keno. Dogane bale ante ser ke sîstemê qeyûmîye hemserekîye keno hedefê xo û cinîyê herêm sîstemê hemserekîye wazenê û wayîrê ci vejîyenê. Dogane vat: "Ma do bajarekê Pêrî de meclîsanê cinîyan û ciwanan awan bikê. Ma xîret kenê ke seba kooperatîfê cinîyan xebatanê xo hîna lez bikê. Ma do kombîyayîşanê cinîyan bikê zêdêr. Qeyum do nêeşko ma asteng biko ke ma şarê xo rê xizmet bikê. Şarê ma no wezîfe da ma. Şarê ma reyde xebatê ma do dewam bikê."