Almanya, Danimarka,Swêd,Swîsre û Norveç de hêrişê kîmyewî yê dewleta tirke yê vera gerîlayan xeylêk  pê çalakîyanê cîya-cîyayan ameyî protestokerdene.

Paytextê Swêdî Stockholm de kurdîstanijan rayberîya Meclîsê Cinîyan ê Amara de hêrişî protesto kerdî. Çalakîkeran semedo ke bale biancê hêrişanê kîmyewîyan ser kincê sipîyî û maskeyê gazî dayî xo rê. Dima zî derheqê hêrişan de agahîyî ameyî dayene.

Şaristanê Baselî yê Swîsre de endamanê Meclîsê Cinîyan ê Ronahî standê agahdarkerdişî akerd.Cinîyan stand de vilawekî vila kerdî û venga dewletan da ke verê hêrişanê Tirkîya bigêrê. 

Paytextê Norveçî Oslo de zî kurdîstanijan û dostanê înan rayberîya Merkezê Komelê Demokratîkî yê Kurdan (NCDK) de hêrişê kîmyewî protesto kerdî. Çalakîkeran semedo ke bale biancê hêrişanê kîmyewîyan ser kincê sipîyî û maskeyê gazî dayî xo rê. Hemserekê NCDKyî yê Osloyî û temsîlkaranê PJAKî çalakîye de qisey kerd û venga her kesî da ke vera hêrişan bêveng nêmano.

Şaristanê Saarbruckenî yê Almanya de endamanê Meclîsê Cinîyan ê Şîrîne Elemhulî standê agahdarkerdişî akerd. Çalakîkeran hêrişê kîmyewîyî û bêvengîya warê mîyanneteweyî teşhîr kerdî. Cinîyan hêrişan ser o vilawekî vila kerdî û sloganê sey 'Kiştox Erdogan', 'Bimiro xîyanet', 'Biciwîyo xoverdayîşê gerîlayan' vatî.

Paytextê Danimarka Kopenhag de kurdîstanijan û dostanê înan rayberîya Meclîsê Cinîyan ê Sêvê de verê Rêxistina Efû ya Mîyanneteweyîye de hêrişê kîmyewî protesto kerdî. Çalakîkeran semedo ke bale biancê hêrişanê kîmyewîyan ser kincê sipîyî û maskeyê gazî dayî xo rê. Girseyî dima eşkerayîyêke daye û bêvengîya warê mîyanneteweyî şermezar kerde.