Kurdanê ke seba qedînayîşê tecrîdkerdişê Rayberê Şarê Kurdî Abdullah Ocalanî verê Konseya Ewropa de çalakîye kenê, pare kerd ke heta ke CPT heyetêkî bişawo Îmrali ê do çalakîya xo rê dewam bikerê.
Verê Konseya Ewropa de şaristanê Strasbourgî yê Fransa de çalakîya bi şîarê 'Azadîye do ser bikewa, seba Abdullah Ocalanî têbigêrê' dewam kena. Çalakîye hetê Înîsîyatîfê Ocalanî rê Azadîye ra dîyabî destpêkerdene.
Firat Vuralî, endama SMJÊ Zekîye Agirman, Çavreş Torî û Hemserekê FCDK/KAWA Abdulvahap Alperî derheqê armancê çalakîye de ANFyî rê qisey kerd.
Firat Vuralo ke nameyê Merkezê Komelê Demokratîkî yê Kurdan ê Frankfurtî ser o tewrê çalakîye bîyo, ard ziwan ke tecrîdkerdişê Abdullah Ocalanî tesîrê pêro zîndanan keno. Vuralî vat: ''Seke zanîyeno 10ê Kanûne Roja Heqanê Merdiman a. Bi na wesîle ma do 10-17ê kanûne de çalakîyan bikerê Eke Konseya Ewropa û CPT babeta tecrîdî de Tirkîya rê teda bikerê no do tesîrê pêro zîndanan bikero.''
Endama Sîwana Meclîsanê Cinîyan ê Êzidîyan (SMJÊ) Zekîye Agirmanî vist vîrî ke 8 mengî yo kurdî nêeşkenê Ocalanî ra xebere bigêrê û vat: ''Nêzdîyê 11 serrî yo ma verê CPTyî de nobete de yê. Heta ke CPT heyetêkî bişawo Îmrali ma do çalakîyanê xo rê dewam bikerê. Almanya de Frankfurt de mehkeme ceza daye endamêkê DAÎŞî la Tirkîya çend rojî verî hêrişê Şingalî kerd. Ma nê hêrişan qebul nêkenê. Heta ke ma estbê ma do perwerîya Rayberîye û PKKyî bikerê. Rayberîye û gerîlayî xeta ma ya sûr a. Ez venga pêro êzidîyan dana ke wa wayîrê Rayberîye û gerîlayan vejîyê.''
Koma Saarbruckenî ra Çavreş Torîyî vat: ''Dewleta tirke pê çekanê Ewropa hêrişê Şingalî kena. Dewleta tirke nêwazenê kurdî azad bibê. Mesuldaranê nê qirkerdişî ra yew zî keyeyê Barzanî yo. Madem Barzanîyî xo sey temsîlkaranê kurdan vînenê çira destûr danê îşxalê dewleta tirke? Dewleta Iraqî zî mesuldarê nê hêrişan o. Ganî vera nê kerdişan hînî hukmatê Iraqî tewirê xo bimojno.''
Hemserekê FCDK/KAWA Abdulvahap Alperî vat: ''Rayberê ma 23 serrî yo tecrîdkerde yo, no nêno qebulkerdene. CPT qaşo komîteya vergirewtişê îşkenceyî ya. La CPT verê kurdan de kor û lal o. Dewletê Ewropa têna seba menfaatanê xo têgêrenê. Tek derdê înan rotişê çekan o. Ê verê kurdan de mesuldarîyanê xo nêanê ca. Seba azadîya Rayberîye heta peynî ma do têkoşîn bikerê.''
