Almanya ra heyetêk vera şerî semedê paştdayîşê şarê Kurdî waşt ke şiro bajarê Hewlerî yê Başûrê Kurdîstanî la polîsanê almanî destûrê ci nêda. Heyetê ra sîyasetmedaro kurd Abdullah Demîrbaş û Parlamentere û Hemsereka  Partîya Çepe ya Eyaletê Hamburgî Cansu Ozmemîrî vera nayî nêrazîbîyayîş ramojna.

Abdullah Demîrbaşî vat: ''Amancê heyetê oyo ke hema ke mabênê hêzanê kurdan de pêkewtiş nêvîyayo rayîrê dîyalogî abikero. Hêzê ke destûr nêdanê ma şirê wazenê ke kurdî se serra 21. de bêstatû bimanê û herra Kurdîstanî reyna bêro îşxalkerdene la ê se kenê wa bikerê ma do destûrê nayî medê. Ma tîya ra reyna veng danê Mesûd Barzanî û Serekkomarê Iraqî Behram Salihî û heme hetanê kurdan ke wa na  mesela pê dîyalogî bêro çarserkerdene.''

Cansu Ozdemîre zî vat: ''Ma waşt ke Hewlêr de tay pêvînayîşan bikerê û rewşa sîvîlan bibersê. Xora hêrişî vera sîvîlan yenê kerdene. Hêrişê vera Kampa Mexmûrî ke binê çimdarîya Netewayanê Yewbîyayeyan de ya zî ramojneno ke tirkîya vera PKKyî nê vera sîvîlan şer kena. Pê nê şerî yeno waştene ke şarê kurdî bêro qedînayene. Ma waşt PDKyî ra vajê wa verê şerî amekero. Hukmatê Almanya ke nêverda ma şirê bi nê tewirê ramojna ke ê Kurdîstan de haştîye nêwazenê. Nê wazenê bazirganîya çekan bi Tirkîya zirar bivîno. Ma  meşirê zî ma sey heyetê do semedê haştîye xebatanê xo  bidomnê.''

Hetê bînî ra Endamê Eyaletê Meclîsê Berlinî Hakan Taşo ke sey endamê Heyetê Haştîye Hewlêr de ame destbendkerdene badê 15 saetan ame veradayene. Taşî vat û nezaret de raştê meameleyê xirabî ame û yeno teqîpkerdene.