Kalkan: 15ê Tebaxe vera koledarîye guleyo verên bi

Endamê Komîteya Rayberdişî ya PKKyî Duran Kalkanî derheqê serrgêra 36. ya Hamleya 15ê Tebaxe de qisey kerd û vat: ''15ê Tebaxe îlanê ronayîşê HRKyî yo zî. Gerîlayanê kurdan ronayîşê xo îlan kerd.''

Endamê Komîteya Rayberdişî ya PKKyî Duran Kalkanî roportajêk da rojnameyê Yeni Ozgur Politika.

Qismo diyîn ê roportajê Kalkanî wina yo:

''PKK Qirkerdişê Maraşî yê 1978î ra dima pê hesîya ke seba darbeyêka newîye amadekarîye yena kerdene. Xoverdayîşê Sêwrege vera na amadekarîye xebata gerîlatîye kerd.Rayber Apoyî payîzê 1979î ra dima venga gerîlayan da. PKKyî vera Darbeya 12ê Êlule bi hêzêk. Darbe ra dima zî kadroyanê ma zaf xo nêda destî. Ê dima agêrayî sahaya Filîstîn û Lubnanî. Kadroyê rêxistinan ê bînan ameyî tepiştene. Rayber Apoyî hetêkî ra ver Darbe amadekarîye kerdêne hetêkî ra zî rêxistinanê bînan reyde têkilîye ronayêne. Rayber Apoyî xîret kerd ke rêxistinanê bînan ê kurdan sey UDGyî reyde îtîfaq bikero la înan qebul nêkerd. Dima rêxistinanê Tirkîya reyde xebata cephe ameye kerdene. Netîce de Cepheyê Xoverdayîşê Yewbîyayeyî yê Vera Faşîzmî (FKBDC) ronîya. Mîyanê înan de sey rêxistina kurdan têna PKK estbi. La wexto ke PKK sahaya Lubnan-Filîstînî ra gêra welat nê rêxistinî zaf tersayî. Netîce de peynîya 82î de FKBD vila bi. Înan ra tay rêxistinan Hamleya 15ê Tebaxe ra dima bi fekkî hêrişê PKKyî kerd û vat ke PKK rêxistinêka şorişgêre nîya.

Dima ke gerîlayî seba Hamle agêrayî welat rayberîya Mehmet Karasungur û Embaz Egîdî de kampan de ameyî pêser. Peynîya çeleyî û destpêkê sibata 1984î de Komîteya Merkezî 2 kombîyayîşî kerdî. Kombîyayîşan de têkoşîno rêxistinkerde-îdeolojîk, têkoşînê kadroyan, amadekarîya xoverdayîşê çekdarî, paratîkê ci ameyî nîqaşkerdene. Seba ke Mehmet Karasungur şehîd bibi partîya ma tengasîye antêne. Ma hetêkî ra vera tasfîyekeranê sey Semir û Bakîyî zî têkoşîn kerdêne. Kombîyayîşan de rexne û xorexneyî ameyî kerdene. Netîce de ma bire daye ke stratejîya Kongreya 2. bêra teqîbkerdene û gamê taktîkî bêrê eştene.

Nê esasî ser o nîsana 84î de bire ameye dayene ke embaz Egîd xeta Şirnex-Qilebanî de, embaz Abdullah Ekîncî Çelê de çalakîyan aver berê. Uja de nê embazan vera ajanan çalakîyê qijî kerdî la nê çalakîyî zaf bitesîr nêbîyî.

Dima Rayber Apoyî seba ke têkoşînê gerîlayan û şarî bîyaro têhet tay xebatî kerdî. Hêverî Xinerê de çalakîyêke ameye kerdene. Bire dîyaye ke rêxistinêka gerîlayan wa bêra ronayene. Coka Hêzê Xelisîyayîşê Kurdîstanî (HRK) ronîyayî. Xoverdayîşo çekdar binê nameyê na rêxistine de do biameyêne kerdene. Behdînan de kombîyayîşêk de na rêxistine hetê çalakîye ra ameye zelalkerdene, Şikefta Birîndara de kombîyayîşê diyînî de planê stratejîya çalakîyan ame eşkerakerdene.  A roje bire ameye dayene ke 15ê Tebaxe de çalakîye bêra kerdene û nê çalakîyî do hêverî Şemzînan, Dih û Şax de bêrê kerdene. Seba hîrê grûba çekdare hîrê çalakîyî. Çalakîya Şaxî hetê Ebubekîrî ra, çalakîya Şemzînanî hetê Embaz Abdullahî ra û çalakîya Dihî zî hetê embaz Egîdî ra do biameyêne îdarekerdene.

Bi nê hawayî 15ê tebaxe de ame îlankerdene ke HRK ronîyayo. Gerîlayanê kurdan ronayîşê xo îlan kerd. Çalakîya Şaxî nêameye caardene. Çalakîya Dih û Şemzînanî ameyî caardene. Şemzînan de pêkewtiş qewimîya. La Dih de gerîlayan şaristan visna destî, dest na depoyê çekan, propaganda kerd. Embazan mîkrofonê camî ra vilaweke wende û îlan kerd ke HRK ronîyayo û gerîlayan eşt uja ser û şerê azadîya Kurdîstanî reyna dest pêkerd.

Zanistî seba Hamleya 15ê Tebaxe vanê 'Guleyo Verên'. Hamleya 15ê Tebaxe vera koledarîye guleyo verên bi, destpêk bi. Ma tim amadekarîya na hamle nimite, ma mîyanî ra xebata xo kerde. Coka hamleya ma hende ser kewte.

Xora Hamleya 15ê Tebaxe zaf tesîrê şarî, gerîlayan û partî kerd. Semir û Bakîyî wexto ke hamle eşnawite remayî şîyî. Bi hamle tewiro şorişgêr ê PKKyî bi zelal, xeta şorişgêre bîye zixm û xeta tasfîye û ajanîye çin bîye. Tewr zaf tasfîyekeran hêrişê PKKyî kerd û PKK rexne kerd. La hamle moral, kêf, enerjî û kelecanî dayî partîya ma.

Bêguman dewlete zî zaf binê tesîrê hamleya ma de mende. Dewlete tersaye coka polîtîkaya îtîrafkerîye ferz kerde. Dewlete vatêne qey têgêrayîşê ma demkî, oputrunîsy û bêpratîk o. La Hamleya 15ê Tebaxe ra dima hende tersaye ke hêverî di rojan çalakîye mîyan kerde. Wexto ke înan çalakîya ma eşkera kerde, cuntaya Kenan Evrenî seba ma vat 'eşkîya', 'Têgêrayîşê yew-di kesan o, ma do nînan çin bikerê.' Înan vera gerîlayan şerê konrta-gerîlayan da destpêkerdene. Mesuldarîya hêrişan ê leşkerîyan mesuldarîya Kenan Evrenî de bîye, mesuldarîya sîyasî û ekonomîkî zî milê Turgut Ozalî de bîye. Kenan Evrenî esasê ' harbê gayr-î nîzamî' de seba ke moral bido leşkeran ame Dih û Şemzînan. Gerîlayan da konvoyê înan ro, leşkerê pawitoxî yê Evrenî kişîyayî, 2 leşkerî zî birîndar bîyî. Turgut Ozalî seba ke bimojno têgêrayîşê gerîlayan hende girîng nîyo şi tatîl. La wina nêbi. Ozalî mîyanî ra amadekarîya xo kerdbi.

Sey Darbeya 12ê Adare nêbi. Gerîlayan xo aver berd, xo rêxistin kerd, vera 12ê Êlule bi planan têgêrayî. Coka gerîlayî hende ser kewtî.

Welatê bînî 12ê Êlule ra dima vera Tirkîya vejîyabî la ê Hamleya 15ê Tebaxe ra dima wayîrê cunta vejîyayî. TCyî cade mesele berde rojdemê NATOyî û vera PKKyî zaf komplo kerdî. O çax serra 1986î de Olof Palme kişîya. Înan sûîkastê Palmeyî eşt milê PKKyî. Na çarçewe de bi nameyê Dawaya Dusseldorfî PKK ame hukmkerdene. NATOyî seba ke verê PKKyî bigêro her ca de paştî daye TC.

Şarî bi hawayêkê coşî wayîrê gerîlayan vejîya. Şarê Botanî dima ke çalakîyê PKKyî eşnawitî ciwanî ameyî Botan û tewrê gerîlayan bîyî. Hamleya 15ê Tebaxe ra dima Ewropa de û Rojawan de zî xeylêk kesan û dezgehan paştî daye PKK. Rêxistinanê bînan ê kurdan ra ciwanî derbazê PKKyî bîyî. Ewropa de hetê madîyatî ra zî paştdayîşêko aktîf virazîya. Kurdanê Ewropa kêna û lajê xo şawitî gerîlayan.

Rojawan de zî Hamleya 15ê Tebaxe ra dima welatperwerî dormeyê PKKyî de kom bîyî. Cade pêro Rojawan bi Apogîr. Ciwanê Rojawanî tewrê gerîlayanê Botanî bîyî. Şarê Rojawanî seba ke paştî bido domananê xo tewrê ERNKî bi.

Xoverdayîşê Azadîya Kurdîstanî bêmîsal o. No xoverdayîş bi paştdayîşê şarî bi pîlêr û hêzêr. 15ê tebaxe de şarî estbîyayîşê xo, tarîxê xo, ameyoxê xo û nasnameyê xo dî. Şarê kurdî rixmê pêro heqaretan zî xeta azadîye dîye! Hamleya 15ê Tebaxe heq da kurdan ke sey merdiman bimirê. Çunke kurdî qirkerdişan de merdêne.

Zîndanê Amedî de bira rûmetê neteweyî dîyaye. Xoverdayîşê 14ê Temmuze na bire daye. Hamleya 15ê Tebaxe na bire zivirnaye hetê gerîlayan, kirişte koy û kerrayan, kerde cuyêka newîye.''