Koln û Vîyana de Seyîd Riza û embazê ci ameyî yadkerdene

Seyîd Riza û embazê ey serrgêra 82. a qetilkerdişê înan de şaristanê Kolnî yê Almanya û şaristanê Viyana yê Awusturya de ameyî yadkerdene.

Seyîd Riza û embazê ey serrgêra 82. a qetilkerdişê înan de şaristanê Kolnî yê Almanya û şaristanê Viyana yê Awusturya de ameyî yadkerdene.

Şaristanê Kolnî yê Almanya de Seyîd Rizayî û 6 embazê ci yê ke 82 serran verê cû hetê Dewleta Tirkan ra ameyî qetilkerdene bi çalakîyêke ameyî yadkerdene. 150 kesî Merkezê Komelê Demokratîkî yê Kurdan de 17ê teşrîna peyêne tewrê çalakîye bîyî. Yadkerdişî de hem kirmanckî hem zî kurmanckî pêşkêşî ameyî kerdene û bale ameye antene girîngîya ziwanî ser o. Salone bi fotografanê Seyîd Rizayî û embazanê ey, Sakîne Cansiz, Mazlum Doganî ameye xemilnayene. Seba kesanê ke Terteleyê Dêrsimî de, Têkoşînê Tevgêrayîşê Dêrsimî de û Rojawanî de şehîd bîyî findî ameyî tavistene.

Hemserekê Kongreya Awankerdişê Dêrsimî  Alî Çatakçînî qiseykerdişê xo zafêrî bi dîyalektîkê kirmanckî kerd û veng da ke seba ke ziwanê dayîke bêro ciwîyayene veng da.

Çatakçînî bi hawayêkê pêtî vist vîrî ke ganî kurdî dormeyê yewîya neteweyî de bêrê pêser ke hînî nêrê qirkerdene. Çatakçînî vat: "Sedemo bingeyên ê qirkerdişanê Seyîd Rizayî, Elîşerî û Zerîfayan kurdayetîya înan bi." Nameyê KCDK-E ser o Hemsereke Fatoşe Goksungur qisey kerd û vat  asîmîlasyon ewro zî bêmaben dewam keno û Rojawan, Şengal, Vakur û Başûrê Kurdîstanî ra mîsalî dayî. Goksungure vat: "Vatişê Seyîd Rizayî 'Ez şima verî de zanî nêna ro' serran ra pey Cizîrî de Mehmet Tunçî bi vatişê 'Pê ma sereberz bibê, ma zanî nêno ro' girewt xo milî. No yew mîras o û tradîsyonê xoverdayîşî yo. Ewro Rojawanî de bi seyan şerwanî bi nê mîrasî bi hawayêkê çêrî şer kenê." 

Bernameyê yadkerdişî de derheqê Terteleyê Dêrsimî de sînevîzyonêk ame mojnayene. Hozan Comertî, Denize Deman, Besere Şahîn û Hozan Şemdînî zî bi deyîranê xo şehîdî yad kerdî. Bernameyê yadkerdişî bi vailakerdişê loqmeyan qedîya.

Paytextê Awusturya Vîyana de zî serrgêra 82. a qetilkerdişê Seyîd Rizayî û embazanê ey bi bernameyêkî ameye yadkerdene. Bernameyê yadkerdişî hetê Merkezê Kulturî yê Elewîyan ra ame serûberkerdene û Wekîla Verêne ya HDPyî ya Amedî Nursele Aydogan û Hemserekê Merkezê Kulturî yê Elewîyan Şahîn Kuçîn tewrê bernameyî bîyî. Bernameyê yadkerdişî deqayêkê rêzgirewtişî ra dima dest pêkerd û seba şehîdan bi dûayan dewam kerd.  Nursele aydogan bernameyê yadkerdişî de qisey kerd û vat: "Ez şexsê şehîdê Kerbelayî Îmam Huseynî de Pîr Sultan Abdal, Mazlum Dogan, Sakîna Cansiz, Atkan Mahîr û Doktor Baran û pêro şehîdanê Kurdîstanî yad kena. Serdestî wazenê ke bi vîrakerdişî estbîyayîşê xo dewam bikê. Wazîfeyê ma zî no yo ke şehîdanê xo şorişgêranê xo xo vîrî ra nêkerê."  Hemserek Şahîn Kuçînî zî îfade kerd ke sere de Elewîyan ganî pêro şarê Kurdîstanî  wayîr bivejîyo têkoşînê çar parçeyê Kurdîstanî.