Koma Kampanyaya 'Azadîye do Ser Bikewa û Semedê Ocalanî Têbigêrê' hêrişê polîsanê Fransa, Walîtîya Strasbourgî bi xurtî şermezar kerdî.

Kome eşkerayîya xo de vist vîrî ke Rayberê Şarê Kurdî Abdullah Ocalan 23 serrî yo binê tecrîdêkê giranî de yo û no tecrîd hetê hêzanê mîyanneteweyîyan ra yeno caardene, Tirkîya zî garantorîya tecrîdî kena.

Eşkerayîye de ame parekerdene ke kurdan çalakîya 2ê teşrîna verêne de waşt ke Konseya Ewropa û CPT sozê xo bîyarê ca û vera tecrîdî têbigêro.

Eşkerayîye de wina ame vatene: ''CPTyî raporê xo yê 2020î de û Meclîsê Parlamenteran ê Konseya Ewropa 23ê teşrîna verêne ya 2020î de qebul kerd ke tecrîd esto. La nê prosesî de Sekreterîya Pêroyî ya Konseya Ewropa û Komîteya Wezîran qetî dewleta tirke rê teda nêkerd. Dezgehê sey Konseya Ewropa vera sûcê tecrîdî bêveng manenê û bi nê hawayî eşkera kenê ke ê zî parçeyêkê rejîmê Îmraliyî yê. Kurdan û dostanê înan çalakîya xo de waşt nê çîyan bîyarê ziwan.

Nawnayîşî ra dima çalakîkeran dest pê çalakîya xeyme kerd la polîsanê Walîtîya Strasbourgî bi giranî hêrişê înan kerd. Polîsan pê gazî, jopan da merdiman ro, erdî ra merdimî kaş kerdî û xeylêk kesî destbend kerdî.

Ma nê hêrişê barbarî bi xurtî şermezar kenê, xoverdayîşê şarî selam kenê. Kampanyaya ma xebatanê xo rê do dewam bikera.''