Konfederasyonê Cimatanê Mezopotamya yê Almanya (KON-MED), seba çalakîya "7000 metreyî, 7000 merdimî" ya roja Şemeyî ya Dusseldorfî eşkerayîyêka nuştekîye weşanaye û vengdayîşê tewrbîyayîşî kerd.

Eşkerayîye de xoverdayîşê grevê vêşanîye, rojeyê mergî, hetê bînî ra çalakîyê ke bi eynî amancî Kurdistan û çar hetanê dinya de yenê vişratene ameyî vîrardene.

KON-MED'î bale ante sere sewîyeya krîtîk a grevê vêşanye û da zanaye ke, ”Seba ke bi vengêko heybet çalakîye dinya ra bêra heşnayene, Dusseldorf de çalakîya ‘rêzila merdimî’ do bêra viraştene û nê parê kerdî:

''Şarêk bi hawayêko pêroyî xo ver ro dano. Şarê ma êdî nêeşkeno vera sîstemê tecrîd û îşkenceyî yê Îmralîyî de tebat bikero. Nê tecrîdî bi tewr hawayêk qebûl nêkeno. Şarê ma wazeno ke Rayberê Şarê Kurdî Abdullah Ocalan bi hawayêko azad biciwîyo û bixebitîyo. Sîstemê tecrîd û îşkenceyî yê Îmraliyî, bîyo metodêkî rayberîye, tewirê îdarekerdişî. Coka serkêşîya ke Kurdistan û Tîrkîya de kerda xo ver, bi tecrîdkerdişê her kesî, têsîrêko xirabin bi merdimîye keno. Seba naye zî no sîstemê tecrîdî, sîyaset û zîhnîyeto qirker-faşîsto ke verê tecrîdî û sîstemê tecrîdî akerdo ganî bêro wedaritene.

Seba rijnayîşê nê sîstemî, ganî ma bi wijdan têgêrayîş bikerê, fam bikerê û xoverdayîşî ra wayîr bivejîyê. Nê xoverdayîşî, der û dorê sîyaset û zîhnîyetê qirker-faşîstî girewto û ardo sînorê rijnayîşî. Ganî ma bi xurtî hevalanê ke zîndanan de grevê vêşanîye de yê û dayîkanê leçegsipîyan ra wayîr bivejîyê. Dayîkê leçegsipî, vera her tewir zext, teror, şîdet û heqaretî de bi qehramanî xo ver ro danê. Heta peynîye, heta serkewtişî xo ver ro danê. Ganî her kes dorê nê xoverdayîşî de bêro têhet, hîratir çalakîyan bikero û têkoşînî gird bikero.  11'ê Gulane 2019 de bajarê Dusseldorfî yê Almanya de serkêşîya KON-MED NRW’î û bi tewrbîyayîş panc federasyonanê Almanya çalakîyêk do bêra viştene. Çalakîye di hetan ra ‘rêzila merdimî’ do bêra pêardene. Çalakîye de seba temsîlkerdişê 7000 hevalanê ke grevê vêşanîye de yê, ma do 7000 kesî wareyê çalakîye de amade bibê.”