KON-MED: Vîrusê Korona ra vînbîyayeyê ma zêdîyenê

KON-MEDî bale ante kurdîstanijan ser ke pê vîrusê Korona kewtî û merdî û vat: ''Almanya de ma ra 11 kesî merdî. Ganî ma tedbîranê xo bizêdînê.''

Konfederasyonê Komeleyanê Kurdîstanijan ê Almanya (KON-MED) derheqê tehlukeyê vîrusê Korona de eşkerayîyêka nuştekîye daye. KON-MEDî da zanayene ke Almanya zî tede zaf welatan de ke tede multecîyê kurdî estê 300 kurdî pê vîrusê Korona kewtî û 11 kurdî merdî.

KON-MEDî eşkerayîya xo de vat: ''Ganî ma tedbîranê xo zêdêr bikerê, seba ke bi rayîrê temasî vîrus nêgêrê bi berpirsîyarîye û hîsgerîye têbigêrê. Şarê ma ganî waranê sixletênan ra xo dûrî bigêro. Goreyê zanayîşanê peyênan Almanya de 11 kurdîstanijî vîrusê Korona ra merdî. Hetê bînî ra embazê ma Canbaş Rostemî yo ke Rojhelatê Kurdîstanî ra yo, Frankfurt de ciwîyeno û heyetê îdareyî yê federasyonê ma de ca gêno, pê vîrusî kewt û keyeyê ey ra di kesê bînî zî binê karantîna de yê. 

Ma tim hîşyarî danê! Ma reyna vajê ke keremê xo ra heta ke şima neçare nêmendî mevejê teber! No vîrus pê tedbîran yeno vergirewtene. Ganî her kes bidîsplîn têbigêro. Mumkîn nîyo ke ma vera nê vîrusî bêveng bimanê. Ma Heyetê Koordînasyonê Krîzî amade kerdî ke 13 kesan ra yeno meydan. Pêro Merkezanê Komelê Demokratîkî, meclîs û komunanê ma de Koordînasyonê Krîzî yê Têkoşînê Vera Vîrusê Korona ameyî awankerdene.Ganî nê prosesî de ma xo ver bidê ke şar panîk nêbo, seba tedbîran hîşyar bibê, moralê şarî xurt bikerê. 

Almanya de ma ekîpa weşîye awan kerde ke 13 doktoran ra yena meydan. Zanayîşê ke hetê Koordînasyonanê Têkoşînê Vera Vîrusê Korona, Komîteya Weşîye ra yenê parekerdene do meclîsan, şarê ma reyde bêrê parekerdene. Ma pê bawer ê ke paştdayîşo xurt ê komelî heqê nê rojan ra do bêro. Ma keyeyan û heskerdoxanê kurdîstanijanê ke wefat kerdî rê serweşîye wazenê. Ma nêweşan rê zî şîfaya xeyrêne wazenê.''