Konferansê Rojawanî yo ke hetê Parlamentoyê Ewropa ra yeno serûberkerdene de sedem û netîceyanê îşxalê dewleta tirke ser o ame behskerdene. Rojnamegerê misirijî vat  Erdogan sucdarê şerî yo û ganî bêro hukmkerdene.

Roniştişê yewînî yê roja diyîne yê konferansî de derheqê îşxalkerîya dewleta tirke, binpaykerdişê heqanê merdiman û huqûqê mîyanneteweyî de ercnayîşî ameyî kerdene.

Roniştişê yewînî bi moderatorîya Majdolane Hasan dest pêkerd û Partîya Yewîya Sûrîye ra Nazire Gewrîye qisey kerd û vat: "Hêrişê dewleta tirke zaf cayan de dewam kenê û gefêko raştikên o. No operasyon operasyonêkê haştîye ney ê şerî yo. Tirkîya newe ra DAÎŞ ganî kena. Armancê ci seba terorîstan herêmêka biasayîşe viraştiş o."

Sazkerdoxê Keyeyê Muşahede yê Heqanê Merdiman ê Sûrîye Ramî Abdulrahmanî vat: "Tirkan operasyonanê leşkerîyan de huqûqo mîyanneteweyî binpay kerd. Nê binpaykerdişan têna zerar nêda sivîlan û malanê înan, heman wext de hedef kerd ke nasnameyê herême zî bivurnê. Seba ke nê binpaykerdişî bêrê vindartene ganî ma têbigêrê."

Meclîsê Kantonê Serêkanîye ra cigêrayox Jîyan Huseyîn vat: "Herêmê ke dewleta tirke tira sey herêmanê biasayîşan behs kena herêm ê ke ameyî îşxalkerdene yê. Dewleta tirke bi nameyê haştîye herême de falîyetanê terorî kena."

Meclîsê Demokratîkî yê Sûrîye ra Hayat Naîsse vat: "Îşxalê Tirkîya gef ro tecrubeyê îdareyê xoserî waneno. Têna gef ro şarê kurdî ney pêro şaranê Sûrîye waneno. Dewleta tirke de neweşîya dişmenîya kurdan esta."

Rojnamegerê misirijî Nashet Elheedyî vat: "Erdogan wazeno ke yew împaratorîya Osmanijan a newîye awan biko ke kurdî û erebî do tira zerar bivînê. Ganî ma Parlamentoyê Ewropa de bi hawayêkê xurtî biqîrê ke kam do nê binpaykerdişan vindarno. Erdogan sucdarêkê şerî yo û ganî bêro hukmkerdene. "