Kongreya Blokê Neteweyî ya Galîçya de kurdan û HDPyî rê paştî dîyaye, dewleta tirke sey 'îşxalkere' ameye pênasekerdene û kongre destek da bira şinasnayîşê Îdareyê Xoserî ya Parlamentoyê Katalanî.
Blokê Neteweyî yê Galîçya (Bloque Nacionalista Galego-BNG) kongreya xo ya 17. şaristanê A Coruna de 7ê teşrîna peyêne de bi şîarê 'Ma do ser bikewê-Galîyayêka newîye' kerde.
Galîçya 17 herêmanê xoseran ê Îspanya ra yew a û nufusê ci 3 mîlyon o. 103 endam û delegeyî tewrê kongre bîyî. Galîçya de ziwanê îspanyolkî û galkî yenê qiseykerdene. Temsîlkarê HDPyî yê Ewropa Dervîş Çîmen zî dawetê kongre ame kerdene.
Kongre de verî vernîyazê serê paştdayîşê HDPyî û demokratîkbîyayîşê Tirkîya ame qebulkerdene, vera şer û îşxalê Kurdîstanî sozê pawitişî dîya.
Vernîyazê bi nameyê 'Vernîyazê semedê çareserîya haştîyane ya meseleya kurdan û demokrasîya Tirkîya' wina yo:
''BNG ronayîşê ci ra nata hetê HDPyî de yo. Ma paştî danê HDPyî ke bi sîstematîkî vera ci hêriş û teda yenê kerdene. Tedaya vera HDPyî serdestîya huqûqî û azadîya Tirkîya rê gef ê. Dewaya qefilnayîşê HDPyî 500 endam û îdarekaranê HDPyî rê zî qedexeyî ferz kenê. Dewaya Kobanê zî na dewaya qefilnayîşî zî edîl nîyê û aqilî ra dûr ê. Coka ma nînan qebul nêkenê.
Muhakemekerdişê tirkan verî zî 6 reyî partîyê kurdan qefilnabî. Pê qedexekerdişê karanê HDPyî do temsîlîya 6.5 mîlyon weçînitoxxan bêra çinkerdene û demokrasî rê derbêka pîle do bêra dayene.
Nika hemserekê verênî Fîgene Yuksekdag û Selahattîn Demîrtaş, wekîlî Leyla Guven, Sebahate Tûncel, Ayla Akat Ata, Gulser Yildirim, Îdrîs Balûken, Abdullah Zeydan, Nazmî Gur û Mûsa Farisogûllari zî tede tewr tay 4 hezar endamê HDPyî tepişte yê, rejîmê Erdoganî dest nayo 60 şaredarîyan ser û 40 şaredarî wezîfeyî ra ameyî girewtene.
Goreyê ma HDP sîyasetê Tirkîya de nêbo nêbeno û beşdarîya HDPyî semedê çareserîya meseleya kurdan do zemînêkê pozîtîfî awan bikera.
Ma paştî danê HDPyî û venga selahîyetdaranê tirkan danê ke sere de Abdullah Ocalan wa pêro endamanê HDPyî yê tepişteyan û sîyasetmedaranê tepişteyan bêrê veradayene.
Seke Yewîya ewropa raporanê xo yê 2021î de eşkera kerdo Tirkîya Rojawanê Kurdîstanî û Başûrê Kurdîstanî de heqanê merdiman binpay kena, sûcanê şerî kena û Tirkîya nê cayan de 'hêzê îşxalî' ya. Herinda nê îşxalî de ma bira Parlamentoyê Katalanî raşt û girîngî vînenê ke 20ê teşrîna verêne de Îdareyo Xoser ê Rojawanî şinasnabi. Ma paştî danê na bire.''
