Kurdan  û dostanê înan paytextê Belçîka Bruksel de verê Parlamentoyê Ewropa de hêrişê îşxalî yê vera Kurdîstanî şermezar kerdî.

Çalakîya protestoyî ke hetê Merkezê Kurdanê Demokratîkan ê  Belçîka (NAV-BEL) ra ameye organîzekerdene Meydanê Luxembourgî yê verê Parlamentoyê Ewropa (PE) de ameye kerdene.  Fransa, Almanya û Hollanda ra zî xeylêk kesî tewrê çalakîye bîyî. Çalakîye de slogana ''Ma pêro PKKyîj ê'' bîye berze.

 Xeylêk parlamenteranê Ewropa  yê ke tewrê çalakîye bîyî qisey kerd û mesajê paştdayîşî yê semedê şarî kurdî dayî û vat ê hêrişanê vera kurdan qebul nêkenê. Parlamenteran veng da ke wa Yewîya Ewropa hetê problemî de nê  hetê çareserî de vindero.

Hemserekê NAV-BELî Davut Keskînî zî ard ziwan ke kurdî şer nê haştîye wazenê û rixmê heme hêrişan do tim semedê ardişê haştîye bigurîyê.

Hemserekê PJAKî Sîyamend Muinîyî zî ard ziwan ke şarê kurdî rixmê heme hêrişan teslîm nêbeno û vat payrabîyayîş zaf mîhîm o.

Hemserekê KCDK-E  Yuksel Koçî zî bale ante ser ke kurdî semedê dinya hinî bîyî çimeyê hêvî yê û vat her kes zano ke çareserîya meseleya kurdî û krîzê Rojhilatê Mîyanênî pê azadîya Rayber Apoyî mumkun a.

Elif Saricaya ke bi  nameyê TJK-E qisey kerd vist vîrî ke çar parçeyanê Kurdîstanî de cinîyî bi hewayêkê sîstematîkî raştê faşîzmî yenê û vat dewleta tirke bitaybetî dişmenîya haştîye, demokrasî û edaletî kena.

Kongra Starî ra Asya Abdullah zî bale ante tecrîdê serê Rayberê Şarê Kurdî Abdullah Ocalanî ser û vat: ''No tecrîd semedê merdimîye şerm o. Kam ke çareserîya bi haştîye wazeno ganî proje û fîrkranê Rayberê Şarê Kurdî esas bîgiro. Dewleta tirke Kurdîstan de sey DAÎŞî hêrişê qirkerdişî kena. Dewleta tirke nê hêzê xo bêvengîya hêzan û dezgehanê  mîyanneteweyî ra gena. Ganî komelê rayapêroyîye vera nê hêrişan vengê xo berz bikero.''