Kurdistanijê ke bi vengdayîşê TJK-E û KCDK-Eyî vejîyayî wareyan xeylî meydanan de tecrîdê girankerdekî yê serê Rayberê Şarê Kurdî Abdullah Ocalanî protesto kerdî û vengê paştîdayîşî da xoverdayîşê Leyla Guvene.  

BERLÎN

Kurdistanijan paytextê Almanya Berlîn de HBF de çalakîye viraşte û posterê Guvene û Ocalanî akerdî.

Kîtle bi slogananê “Bijî berxwedana Leyla”, “Bijî Serok Apo”, “Leyla Guvene rûmeta ma ya”, “Merdimîye mekewe ra, wayîrê rûmetê xo vejîye” û “Biciwîyo hetgêrîya enternasyonalîste” zere û teberê HBFyî de çalakîye viraşte.

BREMEN

Şaristanê Bremenî yê Almanya de hetê Kurdistanijan ra seba paştîdayîşê xoverdayîşê Guvene û bale biancîyo ke aye amîya sînorê mergî çalakîyêk amî viraştene.

Kurdistanijê ke HBFyê Bremenî de ameyî têhet, bandê sîyayî dusnayî fekanê xo ra û çalakî viraşte.

Çalakîye de dovîzê ke bale antêne Guvene resaya sînorê mergî ameyî kiriştene û çalakî heta saetanê şanî dewam kerde.

HANNOVER

Şaristanê Hannoverî yê Almanya de zî bi vengdayîşê Meclîsê Cinî yê Ronahî çalakîyêk amî viraştene. Çalakîya ke vernîya Îstasyona Trêne ya Merkezî de amî viraştene de bale ancîya xoverdayîşê Guvene û ame vatene ke çalakîyê Kurdanê Ewropa do dewam bikerê.

HEILBORN

Bi tewrbîyayîşê Kurdistanijanê ke şaristanê Heilbornî yê Almanya de ciwîyenê û yê temsîlkaranê MLPDyî çalakîyêk amî viraştene.

Mîtîngo ke mabênê saetanê 18.00 û 19.00 de ame viraştene de xoverdayîşê Guvene ame silamkerdene.

HAMBURG

Kurdistanijê ke şaristanê Hamburgî yê Almanya de ciwîyenê zî seba bale biancê grevanê çalakîye yê ke bi serkêşîya Guvene de dest pê kerdîbî mîtîngêk viraşt. Mîtîng bi vengdayîşê seba rayraşîyayîşê meşte qedîya. 

STUTGART

Kurdistanijê ke şaristanê Stuttgartî yê Almanya de ciwîyenê bi vengdayîşê TJK-E û KCDK-Eyî vejîyayî meydanan.

Rayraşîyayîşo ke HBFyê Stuttgartî ra dest pê kerd heta Schlosplatz dewam kerd. Kîtle dima ra newe ra amî verê HBFyî û mîtîngêk viraşt.

Çalakîye de vilawekê ke bale antêne grevanê vêşanîye û Guvene amîya sînorê mergî ser bi eşkerayî û vengdayîşê mîtîngê meşte qedîyaye.

DORTMUND

Kurdistanijê ke şaristanê Dortmundî yê Almanya de ciwîyenê sere de yê Leyla Guvene bale ante xoverdayîşanê grevanê vêşanîye û tecrîd protesto kerd.

HILDSHEIM

Şaristanê Hildsheim ê Almanya de Kurdistanijê ke bi vengdayîşê KCDK-E û TJK-Eyî ameyî têhet seba ke bale biancê xoverdayîşê Leyla Guvene û halê ci yê weşîye çalakîyêk viraşte.

MANNHEIM

Şaristanê Mannheimî yê Almanya de zî seba bale antişê bi grevanê vêşanîye çalakîyêk amî viraştene.

Çalakîya Mannheimî bi vengdayîşê Meclîsê Cinî yê Ronahî-Berîvane û Meclîsê Cinî yê SKByî amî viraştene. Çalakîya ke tede vilawekî ameyî vilakerdene de hemsereka KCDK-Eyî Fatoş Goksungure vat, “Leyla Guvene û embazê xo hendî ameyê merheleyêka krîtîke. Hewna ke nêbîyo erey ganî welatperwerê ma yê Ewropa û dostê înan çalakîyanê xo hîna bikerê xurt. Ganî ma Ewropa têşanê ke tavilî tecrîd bêro wedartene.” Çalakî bi sloganan qedîyaye.   

PARÎS

Paytextê Fransa Parîs de zî Kurdistanijî û dostê înan payra bî.

Gare du Nordê Parîsî de çalakîya bêîtîatîya sivîl a ke temsîlkarê ACTIT û SKByî zî tewrê ci bîyî de pankartê “Ocalanî rê azadîye” û “Ma heme Leyla Guvene yê” ameyî akerdene û sloganî erzîyayî.

Endama Koordînasyonê Cepheyê Çepî yê Fransa Danielle Simonnete zî tewrê çalakîye bîye.

Simonnete vat, “Hemverê nê meseleyî de bêveng merdişê rayapêroyîye ya Fransa û hukmatê Macronî nêno qebûlkerdene. Hemverê nê halê cidîyî de ganî sazîyê ke têkildar ê tavilî bikewê mîyanê têgêrayîşî.”

Hetêna ra temsîlkarê partîya sîyasîye ya Frans 7î zî bi lez wezîrê karê teberî yê Fransa Jean-Yves le Drianî dir kewtî temas. Yeno pawitene ke wezaretê karê teberê yê Fransa saetanê averî de eşkerayîyêk bido.    

 

MARSÎLYA

Şaristanê Marsîlya yê Fransa de bi serkêşîya Tevgera Ciwanên Şoreşgerî Garê Trêne yê Merkezî de çalakîyêk amî viraştene. Çalakîye de sloganî erzîyayî û bi marşê “çerxa şoreşê” vindertişê hurmetî ame kerdene. Çalakîye de seba tewrbîyayîşê çalakîya kîtle ya Yewşemeyî zî veng ame dayene.   

BORDEAUX

Saristanê Bordeauxî yê Fransa de ciwananê ke endamê Tevgera Ciwanên Şoreşgerî bî Sainte Catherine de çalakîyêk viraşte. Çalakîye de bale ancîyaye serê grevanê vêşanîye yê Fransa, Galler û Kurdistanî û pankarta “Ocalanî rê azadîye” amî akerdene.

Çalakîye de her game sloganê “Bijî Serok Apo”, “Ciwan fedaiyê Rêber Apo ye” û “Serî hilde” erzîyayî.    

LAVRÎO

Şaristanê Lavrio yê Yunanistanî de zî Kurdistanijan rayraşîyayîşêk organîze kerd. Rayraşîyayîşo ke kampa Lavrio ra dest pê kerd bi seya Kurdistanijî tewrê ci bîyî û bi posteranê Rayberê Şarê Kurdî Abdullah Ocalanî û beyraqanê PKK, KCK û HPGyî dest bi rayraşîyayîşî kerd.

Bi slogananê ke erzîyayî Leyla Guvene û xoverdayoxê bînî yê grevê vêşanîye ameyî silamkerdene û meydanê Lavrio de zî mîtîngêk ame organîzkerdene. Mîtîng bi vindertişê hurmetî yê deqeyêk dest pê kerd û qiseykerdişan de ame vatene “Halê Leyla Guvene ya ke seba wedartişê tecrîdê serê Ocalanî kewtebî grevê vêşanîye krîtîk o. Bi seyan şorişgêrî zî seba wedartişê tecrîdî grev de yê. Ma heta peynî kîşta înan de yê û ma do bi çalakîyanê xo paştî bidê înan.” Çalakî bi sloganan qedîyaye.  

LOZAN

Bi serkêşîya Meclîsê Cinî yê Lajinî meydanê Riponne de mîtîng ame viraştene. Çalakîye de mesajê paştîdayîşê waştişanê Leyla Guvene ameyî dayene.

SOLOTHURN

Şaristanê Solothurnî de zî bi serkêşîya Tevgera Ciwanên Şoreşgerî vernîya îstasyona trêne ys merkezî de çalakîyêk amî viraştene. Peynîya çalakîye de seba tewrbîyayîşê çalakîya meşte ya Lozanî vengdayîş ame kerdene.

DEN HAAG

Kurdistanijê ke şaristanê Den Haagî yê Hollanda de ciwîyenê bi vengdayîşê KCDK-E û TJK-Eyî vejîyayî meydanan. Kîtle sloganê “Veng bide Leyla Guvene”, “Ocalanî rê azadîye” û “Tecrîd ganî nika bêro wedartene” eştî.