Kurdî û dostê înan saetanê rewî yê sibayî de çar hetanê Ewropa ra kewtî rayîr û resayî Parîs. Cayê pêserameyîşî Gare du Nord heman wextî de nizdê kuçeyê “La Fayette” de yo ke qirkerdiş şeş serrî verî ûca amebi kerdene.

Çalakwanê ke fotografanê awankerdoxanê PKKyî ra Sakîne Cansize, temsîlkara KNKyî ya Parîsî Fîdan Dogane û endama têgêrayîşê ciwanîye Leyla Şaylemeze kirişnenê her game slogananê protestokerdişê dewleta Tirkî erzenê. Çalakîya emserî rê bi desan komeleyanê cinîyan ê Fransan zî paştî daye. Teberê înan de sere de Partîya Komunîste û organîzasyonê çepî yê Fransa, organîzasyonê Tirkîyayijî zî bi tewrbîyayîşê xo paştîdayîşê xo ramojnenê.

Na çalakî bi slogana ‘hemverê bêcezayî de û seba edaletî’ yena viraştene. Goreyê hayîdarîyanê ke organîzatoran ra ameyî girewtene pêroyîya Ewropa de 100 ra vêşêrî otobusî seba çalakîye kewtê rayîr. Kîşta înan de welat û şaristananê cîranan ra şar bi wesayîtanê xo yê xusûsîyan zî tewrê çalakîye beno.  

Çalakwanî veng danê dewleta Fransa ke kesê ke fermanê qirkerdişî dayê vejê werte û înan muhakeme bikerê. Hetêna ra çalakîye de mesajê paştîdayîşê seba çalakîyanê grevê vêşanîye zî yenê dayene. Waştişanê çalakîya Parîsî de bicaameyîşê edaletî, wedartişê tecrîdê serê Rayberê Şarê Kurdî Abdullah Ocalanî, tavilî şîyayîşê Komîteya Vernîgirewtişê Îşkenceyî (CPT) bi Îmraliyî û peynîardişê bi îşxalkarîya dewleta Tirkî estê.

Yeno pawitene kîtleya ke amîya pêser şiro Meydanê Republique û ûca bi mîtîngêk peynî ro çalakîya xo biyarê. Sehneyo ke Meydan de ameyo ronayene de do derheqê qirkerdişê şeş serrî verî mesajî bêrê dayene.