Serekê partîya lîberal-rastgir a Fransanijan UDI Jean-Chrîstophe Lagerde şi serdana 14 çalakgeranê ke Strasbourg de grevê vêşanîye de yê, ke grevê vêşanîye yê vera tecrîdê serê Rayberê Şarê Kurdî Abdullah Ocalanî 153 rojî yo Strasbourg de dewam keno.

Lagerdeyî derheqê amanc û rewşa weşîya çalakgeran de zanayîşî girewtî.

Hetê exlaqî ra ma deydarê Kurdan ê

Lagerdeyî ard vîrî ke o Meclîsê Mîyanneteweyî de Serekê Gruba Xebete ya Kurdan o, ke  bi nê hawayî ameyo serdane, bale ante serê têkoşînê Kurdan ê vera çeteyanê DAÎŞ’î yê seba merdimîye û vat, “Ez timî dubarê kena hetê exlaqî ra ma deydarê neteweya Kurdan ê.” Lagerdeyî hetê bînî ra vat dewleta Tirkî kewta rayîrêkê winayênî ke tu hûmet nêdana heqanê merdiman û bale ante serê pêvînayîşan ê Ocalanî yê ke 2015’î ra nata ame birnayene û komkiştişê dewleta Tirkî yê ke nê tarîxî ra nata ameyê kerdene.

Tecrîd îşkence yo

Lagerdeyî vat ê rewşa çalakgeranê grevê vêşanîye ra bifikar ê û dewam ci de vat, “Muameleya ke hemwelatijanê bînan rê yena kerdene ganî Rêzdar Ocalanî rê zî bêra kerdene. Tecrîdê 8 serran îşkence yo. Heqê muhîmî estê; mîyanê nînan de avûkatê xo, hevalê xo û keyeyê xo reyde pêvînayîş esto. Nê hemeyî Komara Fransa de û heme dinya de yenê qebûlkerdene.”

Ganî xoserîya Kurdan bêra naskerdene

Lagerdeyî hetê bînî ra vat o grevê vêşanîye sey têkoşînêko muhîm vîneno labelê wazeno ke biqedîyo û da zanayene duştê xoverdayîşî de hukmatê Tirkî mecbûr mendo ke game bierzo û waşt ke tecrîd bêro wedaritene.

Lagerdeyî tewr peynîye de vat ganî heqê xoserîya Kurdan zî bêro naskerdene.