Wezîrê Karanê Teberî yê Almanya Heîko Maasî pare kerd ke eke dewleta Tirkî hêrişanê xo yê leşkerî rê dewam bike, ê do dest bi ambargoyêkê ekonomîkî bikê, naye ra prosesê adirbirnayîşî taqîb kenê. Maasî hêrişê Tirkîya zî sey 'îşxalkarîye' pênas kerdî.
Îdareyê Berlînî hişyarîyêka bîne daye rejîmê Erdoganî ke binê prosesê adirbirnayîşî de zî îşxalkarîya xo rê dewam kena. Wezîrê Karan ê Teberî yê Almanî Heîko Maasî televîzyonê ZDF'yî rê qisey kerd û vat, "Goreyê ma, hêrişê dewleta Tirkî yê ser milîsanê Kurdî goreyê huqûqê mîyanneteweyî meşrû nîyê." Maasî hişyar kerd ke ê do ambargoyê serê Enqere bikê.
Maasî wina dewam kerd: "Eke îşxalkarîya winasêne goreyê huqûqê mîyanneteweyî nîyo, o çax na yena meneya binpaykerdişî yê huqûqê mîyanneteweyî ya." Maasî îfade kerd ke ê do seba ke îşxalkarîya Tirkîya bivindarnê tê bigêrê. Maasî derheqê adirbirnayîşê bi mabençîya DYA de vat, "Ma do pêroyê hêzanê xo têna seba adirbirnayîşê 5 rojên ney, beno ke zêdêr bikê û gama ke dima bêra eştene, seba qedînayîşê îşxalkarîye kar bikê."
Maasî bale ante serê peymana multecîyan a serra 2016a ke rayberîya Almanya de mabênê Bruksel-Enqere de amebî îmzakerdene, û vat ke nê rojan de vatişê Erdoganî yê 'ma do beran abikê' rê bi şik ewnîyenê. Maasî vat ê do Tirkîya reyde derheqê bi zorî berdişê multecîyanê 'Herêma Asayîşêne'a ke Tirkîya wazena serê sînorî de saz bike de pêvînayîş bikê, "Karêko ke goreyê ma meşrû û huqûqî nîyo rê ma pereyan nêdê."
Wezîrê Karanê Teberî yê Almanî da zanayene ke Yewîya Ewropa de seba ke ambargoyanê serê Tirkîya bîyarê serê masa û wina dewam kerd: "Ma bi zelalî vanê ke ma do ambargoyan bikê, nê ambargoyan de ambargoyê ekonomîkî vernî de yeno. Seba naye ma prosesê adirbirnayîşî taqîb kenê. Ma wazenê bizanê ke Tirkîya senî tê gêrena."
